Deputeti i Partisë Demokratike të Kosovës, Eman Rrahmani, është shprehur i gatshëm të mbështesë çdo nismë institucionale dhe kushtetuese për zhbërjen e Gjykatës Speciale.
Ai ka thënë se padrejtësitë ndaj popullit shqiptar dëshmojnë nevojën për unitet, ndërsa ka kërkuar angazhim për lirimin e atyre që, sipas tij, i sollën lirinë Kosovës.
“Padrejtësitë e vazhdueshme ndaj popullit shqiptar tregojnë se, më shumë se kurrë, duhet të jemi të bashkuar. Ndaj atyre që na sollën lirinë, kemi obligim të angazhohemi për lirinë e tyre”, ka deklaruar Rrahmani.
Deputeti i PDK-së e ka cilësuar Gjykatën Speciale si të padrejtë dhe të ndikuar nga Serbia, duke theksuar se është i gatshëm të përkrahë nisma për zhbërjen e saj, për aq sa ato ndërmerren brenda rendit kushtetues.
“Andaj, si deputet i Kuvendit të Republikës së Kosovës, jam i gatshëm të mbështes çdo iniciativë institucionale dhe kushtetuese për zhbërjen e kësaj gjykate, të padrejtë dhe të ndikuar nga Serbia”, ka shkruar ai.
Rrahmani ka shtuar se ky mekanizëm është krijuar me vendim të Kuvendit të Kosovës, ndaj, sipas tij, përgjegjësia institucionale për zhbërjen e tij u takon deputetëve.
“Na takon të mobilizohemi dhe të angazhohemi, brenda rendit kushtetues, për zhbërjen e saj”, ka përfunduar Rrahmani.
Ish-presidenti i Kosovës, Hashim Thaçi është dënuar me 25 vjet burgim, Kadri Veseli 18 vjet burgim, Jakup Krasniqi 25 dhe Rexhep Selimi me 13 vjet burgim.
