Nga përplasje mes dy grupeve të njohura si “Capat dhe Sekiraqët”, në shtatorin e vitit 2024 mbeti i vrarë Premtim Gashi.
Pamjet e gjithë asaj që ndodhi në natën kritike, u publikuan sot në seancën e mbajtur në Gjykatën Themelore të Prishtinës.
Megjithatë, gjykata ndaloi publikimin e tyre.
Me këtë nuk u pajtua Salih Sekiraqa, një prej të akuzuarve kryesor.
“Edhe unë jam pro për atë dëmin për të ndjerin që ka ndodhë mos me e publiku, por jo për sulmin që është bërë se te ne kur po vjen ose dënimi ose lirimi prej popullit, në emër të popullit fjalën e fundit…. Por kur është bërë sulmi sa armatimi, duhet me ditë populli…”, u shpreh i akuzuari.
Kërkesa e Sekiraqës nuk u aprovua.
Elaborimi i provave nga prokurori, solli një përplasje të tij me kryetaren e trupit gjykues, Fatmie Dërmaku.
“Kënd e ka vra Salih Sekiraqa, kënd e ka vra Fatos Abazi, kënd e ka plagosë Korab Gashi apo Valdrin Ademi… Jo, jo të gjithë, jo prokuror dëgjomë të lutem, specifikona në këtë shqyrtim gjyqësor veprimet inkriminuese sepse iu kam thënë në fillim, pa specifikim të veprim inkriminues të secilit të pandehur, çfarë aktgjykimi kemi me marrë”, tha gjyqtarja Dërmaku.
“Zonja gjyqtare unë e specifikova çfarë kanë vepru”, u shpreh ai.
“O prokuror, kur të flas unë ti ndalesh, e ke bë një aktakuzë, Korab Gashi akuzohet së bashku me tjerët ka dashtë ta privojë nga jeta këtë këtë, po me armë a iu ka gjetë armë?, ishte reagimi i gjyqtares.
“Jo, ne kemi thënë prej fillimit se arma është e panjohur”, tha prokurori Zeqaj.
Prokurori Bashkim Zeqaj, shpjegoi se si nisi e gjithë ngjarja.
“Tash momentin që zbresin prej veturës, së paku tetë persona shihen se Prokuroria ka arritë me kuptu që janë së paku tetë persona. Roberti, ata veç kanë fillu me ardhë, Roberti veç po gjuan e shihni… vazhdon shihni Robertin shkon te vetura Opel Zafira e gjithë të pandehurit hynë te lokali ‘From’”, sqaroi ai.
Po ashtu, ai shfaq edhe momentin kur është kryer vrasja duke treguar veprimet e të akuzuarve.
“Ky është Robert Llumnica, me kapelë, e ndërron karikatorin e armës… Ata janë duke e gjuajtur, janë duke u shkëmby armët në të dy anët… I ndjeri Premtim Gashi dhe i pandehuri Robert e ekzekuton nga afërsia”, tha ai.
Pas prokurorisë, radhën për paraqitjen e versionit të saj, e pati mbrojtja e të akuzuarve.
Kritika për video-incizimin e publikuar nga prokuroria, pati avokati i të akuzuarit Valdrin Ademi, Driton Musliu.
Seanca vazhdoi me fjalën e mbrojtjes, të cilët kundërshtuan provat e paraqitura nga prokuroria.
