Kryeministri në detyrë i Republikës së Kosovës, Albin Kurti, ka marrë pjesë mbrëmë në hapjen e edicionit të 18-të të Festivalit Ndërkombëtar të Filmit “PriFest”.
Gjatë ceremonisë, Kurti ka thënë se për gjashtë ditë, nga 8 deri më 13 shtator, Prishtina do të jetë një nga qendrat e rëndësishme të kinemasë rajonale.
Festivali është hapur me filmin “Dua” të regjisores Blerta Basholli, i cili pati premierën botërore në “Semaine de la Critique” në Festivalin e Kanës, ku është nderuar me Çmimin SACD.
Sipas njoftimit të Zyrës së Kryeministrit, Kurti ka theksuar se krahas “Dua”, edhe filmi “Shame and Money” i Visar Morinës do të shfaqet në festival.
Të dy filmat, të subvencionuar nga Qendra Kinematografike e Kosovës, janë kandidatë për çmimin “Oscar”.
Edicioni i sivjetmë i PriFest është mbajtur me motot “For Her” dhe “Forever Vjosa”, në kujtim të producentes së ndjerë Vjosa Berisha.
Programi përfshin gara filmike dhe aktivitete që synojnë shkëmbimin kulturor e profesional në nivel ndërkombëtar.
