Ekspozita e veçantë e Vincent Van Gogh (1853-1890) tash e ka një vend në hapësirën kulturore të Prishtinës.
Përmes një bashkëpunimi mes ambasadës të Holandës dhe Prishtina Music Conference, adhuruesit kosovarë të piktorit të njohur holandez do të mund të përjetojnë artin e tij në një mënyrë të veçantë.
Ambasadorja e Holandës në Kosovë, Astrid de Vries, tha se pa marrë parasysh dështimeve të tij, Van Gogh krijoi art mbresëlënës.
“Jo shumë njerëz e dinë, por Van Gogh kaloi një vit në Londër, në vitet 1873–1874. Në atë kohë, ai ende nuk ishte piktor, por tregtar arti dhe, të them të drejtën, dështoi shumë në këtë fushë. Por mendoj se kjo është fuqia e Van Gogh-ut. Ndonjëherë dështoi, u pengua, u rrëzua dhe e lëndoi veten, literalisht. Por, gjithashtu, krijoi vepra të mrekullueshme arti. Jam e lumtur që jam në Prishtinë dhe që Van Gogh-un e kam edhe këtu me vete. Shpresoj që edhe ju ta shijoni veprën e tij po aq sa unë. Kjo është një ekspozitë e veçantë, gjithëpërfshirëse”.
Duke cituar një thënie të tij, ministrja e Kulturës Saranda Bogujevci, bëri një paralele mes Van Gogh-ut dhe Kosovës.
“Do të doja të citoja një thënie të Van Gogh-ut, i cili ka thënë: ‘Ëndërroj të pikturoj dhe më pas pikturoj ëndrrat e mia’. Natyrshëm, në raste të tilla na vijnë në mendje disa gjëra. Jemi një vend i vogël me ëndrra të mëdha, shumë prej të cilave i kemi bërë realitet. Ëndërruam pavarësinë dhe ia dolëm ta realizonim. Në përputhje me fjalët e tij, edhe ne i pikturuam ëndrrat tona. Kjo ekspozitë paraprake fton drejt një lidhjeje më të thellë me artin përmes ngjyrave, tingujve dhe lëvizjes. Ndërthurja e teknologjisë me artin e sjell Van Gogh-un në jetë, duke ofruar një përvojë që përfshin të gjitha shqisat. Është një shfaqje dinamike për vende të reja dhe dinamike si Kosova”.
E, kryetari i Prishtinës, Përparim Rama, kishte në mendje rininë kosovare gjatë kësaj ekspozite.
“Të gjithë e dimë se Prishtina ka një komunitet shumë të ri, energjik, shumëgjuhësh dhe sipërmarrës. Njerëzit këtu ndjekin ëndrrat e tyre dhe kanë një qasje që gjithçka është e mundur. Përvojat si kjo e Van Gogh-ut, i cili ia doli me forcat e veta, na japin edhe një arsye më shumë për të besuar dhe për të ecur përpara. Kjo është vërtet një hapësirë që fëmijët tanë duhet ta vizitojnë. Shkollat në Prishtinë vijnë këtu për të vizituar ekspozitën dhe për të përjetuar gjëra të ndryshme”.
Nga 20 tetori e deri në 3 nëntor, të gjithë të interesuarit e artit do të kenë mundësinë të vizitojnë Deep Space Prishtina dhe të jenë pjesë e kësaj përvoje të paharrueshme./KP
