Biblioteka Kombëtare e Kosovës “Pjetër Bogdani” dhe Biblioteka Kombëtare Széchényi e Hungarisë kanë nënshkruar një memorandum bashkëpunimi që parasheh projekte të përbashkëta kulturore, shkëmbim të stafit dhe trajnime profesionale në fushën e digjitalizimit.
Sipas njoftimit të Ministrisë së Kulturës dhe Turizmit, marrëveshja synon shkëmbimin e përvojave profesionale, zhvillimin e shërbimeve bibliotekare dhe avancimin e proceseve të digjitalizimit, duke krijuar mundësi të reja për bashkëpunim ndërinstitucional.
Memorandumi u nënshkrua nga drejtoresha e Bibliotekës Kombëtare të Kosovës, Blerina Rogova Gaxha, dhe drejtoresha e Bibliotekës Kombëtare Széchényi të Hungarisë, Judit Gerencsér.
Në takimin ku u formalizua bashkëpunimi morën pjesë edhe sekretari i Ministrisë së Kulturës dhe Turizmit, Bislim Bislimi, si dhe përfaqësues të institucioneve përkatëse të të dy vendeve.
Përmes këtij partneriteti, bibliotekat kombëtare të Kosovës dhe Hungarisë synojnë të forcojnë lidhjet kulturore dhe të nxisin zhvillimin profesional përmes shkëmbimit të njohurive dhe praktikave të mira në fushën e bibliotekarisë.
