Në majin e vitit 2025, qindra nxënës të shkollave në Kosovë iu nënshtruan testit të PISA-s.
Për gjatë 20 ditësh, në këtë vlerësim morën pjesë mbi 6 mijë nxënës.
Por rezultatet që 15-vjeçarët dhanë në këtë test, nuk e ngritën Kosovën në asnjë pozitë.
Kosova vazhdon të jetë në fund të listës, madje para saj janë edhe Palestina që është në situatë luftë, Republika Dominikane e Maroku.
Kurse më keq janë vetëm Guatemala, Zambia, Kenia, Tagjikistani e Reuanda.
Kështu duken pyetjet e një testi nga matematika.
https://pisa2022-questions.oecd.org/platform/index.html?user=&unit=MAT/MA150-TriangularPattern&lang=sqi-ALB
Por nxënësit kosovarë nuk arritën të përgjigjen saktë në të tilla pyetje, duke renditur kështu Kosovën me 351 pikë, apo katër pikë më pak se në vitin 2022.
E më dobët se kaq, renditja ishte në lexim, ku Kosova mori 340 pikë, apo dy pikë më pak se në PISA 2022, ku kishte 342.
Kurse në shkencë nuk pati lëvizje, njëjtë sikurse herën e kaluar, mori 357 pikë.
Në mesin e nxënësve që u testuan ishin edhe ata të gjimnazit “Hivzi Sylejmani” në Fushë Kosovë.
Drejtori i kësaj shkolle, Amir Pllana, tregon faktorët që dërgojnë deri në këto rezultate.
“Jemi mësuar me punu me teori shumë, edhe ana praktike mungon dhe kur mungon ana praktike ne i kemi këto probleme dhe këto efekte. Zakonisht kur bëhet organizimi i testit, nxënësit pas testit ata nuk e paraqesin ndonjë problem të madh, jo ka qenë i lehtë, praktikë, por në praktikë ne po dalim me këtë rezultat”, tha Amir Pllana.
Ai kërkon që të merren disa masa që Kosova të ngritët në listën e shteteve pjesmarrëse në testin PISA.
“Kurrikula e re që ka hyrë në fuqi në 2016 e tash po dëgjoj që duhet me rishiku unë mendoj që kurrikula si dokument është shumë e mirë, por ne kemi problem në teori dhe praktikë. Unë mendoj që në praktikë duhet të punojmë shumë më shumë, me nxënësit me klasa të ngarkuara të shkarkohen ato klasa, të kemi staf të përgatitur edhe me zhvillim profesional të vazhdueshëm”, theksoi Pllana.
Ndërmarrjen e hapave e kërkon edhe njohësi i çështjeve të arsimit, Ismet Potera.
“Hapi i parë është që të marrim këto rezultate, t’i analizojmë në thellësi se çfarë ka ndodhur, ku jemi keq edhe në bazë të këtyre të dhënave ne duhet të bëjmë ndryshime. Pastaj nëse janë problemet në sistem të organizimit, në përmbajtje, në mësimdhënie, janë këto që Pisa po na tregon që nuk jemi mirë e këto nuk ndryshohen brenda vitit”, deklaroi Ismet Potera.
Në këtë raport gjithashtu theksohet ulje e mbështetjes së prindërve, ku në vitin 2025, 64% e studentëve në Kosovë raportuan se prindërit ose kujdestarët e tyre i pyesin, të paktën një herë në javë, se çfarë bëjnë në shkollë.
