Ministri për Evropën dhe Punët e Jashtme i Shqipërisë, Ferit Hoxha, zhvilloi një takim me Komisioneren e Bashkimit Evropian për Zgjerimin, Marta Kos, në margjinat e Këshillit të Çështjeve të Përgjithshme që po zhvillohet në Dublin.
Në fokus të bisedimeve ishte procesi i anëtarësimit të Shqipërisë në Bashkimin Evropian, dinamika aktuale e negociatave dhe perspektivat për avancimin e tyre.
Përmes një postimi në platformën X, Hoxha tha se Shqipëria do të vijojë të jetë e pranishme në çdo forum ku diskutohet zgjerimi i BE-së, me synimin për të paraqitur përparimin e vendit në procesin e integrimit.
“Kënaqësi të takohem dhe të bisedoj me Komisioneren e BE-së për Zgjerimin, Marta Kos, në margjinat e Këshillit të Çështjeve të Përgjithshme, që zhvillohet gjatë këtyre dy ditëve në Dublin. Nuk do të humbasim kurrë asnjë shans për të qenë të pranishëm kudo që flitet për zgjerimin, për të paraqitur modelin e Shqipërisë; dhe kudo që zgjerimi është në axhendë, Marta Kos është aty për ta çuar procesin përpara”, u shpreh Hoxha në postim.
Hoxha theksoi gjithashtu rëndësinë e vijimit të reformave dhe përmbushjes së angazhimeve të ndërmarra nga Shqipëria në kuadër të procesit të integrimit evropian.
“Për Shqipërinë, objektivi mbetet i qartë: të ecim përpara me vendosmëri dhe të mbyllim sa më shumë kapituj negociues të jetë e mundur këtë vit, duke vazhduar të zbatojmë reformat dhe angazhimet. Ne mbetemi plotësisht të përqendruar në punën përpara dhe të vendosur për të ruajtur ritmin e negociatave”, theksoi ministri.
Sipas tij, zgjerimi i Bashkimit Evropian lidhet me “meritën, momentum-in dhe rezultatin”, duke nënvizuar se Shqipëria është e gatshme për të avancuar në të treja këto drejtime.
📍Dublin — A pleasure to meet and catch up with European Commissioner for Enlargement, Marta Kos, in the margins of the General Affairs Council, taking place during these two days in #Dublin.
We will never miss a chance to be present wherever there is talk about enlargement to… pic.twitter.com/8pxl4a1kvm
— Ferit Hoxha🇦🇱 (@HoxhaFer) September 3, 2026
