Në Gjykatën Themelore në Prizren, është mbajtur seanca e radhës në rastin e Auron Thaqit, të riut i cili ishte therrur me thikë, dhe trupi i tij ishte hedhur nga një veturë në lëvizje. Në seancë u publikuan pamjet kryesore të natës kritike.
Me pranga në duar u soll në gjykatore.
Enes Ay, akuzohet për lëndim të rëndë trupor, me pasojë vdekjen.
Pas tij, u soll edhe Hajrullah Brçani, i cili akuzohet për mosdhënie të ndihmës dhe moslajmërim të veprës penale.
Prokuroria Themelore në Prizren, dyshen i ka përfshirë në rastin e Auron Thaqit, të riut i cili ishte therrur me thikë dhe ishte hedhur nga një veturë në lëvizje.
Dëshmitari i fundit për këtë çështje, vazhdon të jetë i paarritshëm.
“Është kërkuar në adresën sikurse në urdhëresë, por nuk është gjetur. Dhe babai i tij, Bekim Isufi, nga i cili është marrë numri i telefonit, jemi njoftuar se Andi Isufi gjendet në Kroaci”, tha Sadije Selmani.
Me këtë rast, seanca vazhdoi me administrimin e provave materiale.
Radha i erdhi shikimit të pamjeve të natës kritike, të 7 korrikut 2024.
Në këtë pamje të një lokali, shihet se si Auron Thaqi, hidhet nga vetura e cila ishte në lëvizje.
“Vërtetohet momenti kur i ndjeri, pra viktima, Auron Thaqi, del nga vetura e markës Skoda, dhe shtrihet në tokë”, theksoi prokurorja Elvene Gashi.
Auron Thaqi vazhdon të qëndrojë i shtrirë në tokë për disa minuta, derisa rreth tij vijnë disa qytetarë.
Ata më pas lajmërojnë Policinë, e cila brenda pak kohësh mbërrin në vendngjarje.
“Vjen zyrtari policor, i cili përkulet në afërsi të viktimës, përsëri mblidhen disa qytetarë në afërsi të viktimës. Tash është momenti i dhënies së ndihmës apo shiqimit të viktimës nga një person i cili zbret nga automjeti që i ka dritat e dhezura”, theksoi Gashi.
Pas tyre, vjen edhe autoambulanca, e cila pas dhënies së ndihmës së parë, e merr viktimën për ta dërguar në Emergjencë.
“Del personeli i urgjencës për t’i dhënë ndihmën e parë dhe e presim momentin kur e fusin në autoambulancë”, pohoi ajo.
Me largimin e trupit të Auron Thaqit, pastrohet edhe vendi nga gjaku.
Në gjykatore u shfaq edhe një pamje tjetër, ku prokuroria pretendon se shihet njëri prej të akuzuarve duke vrapuar.
“Shihet i pandehuri duke vrapuar dhe është vërtetuar se është i pandehuri Enes Ay sipas raportit policor”, potencoi Gashi.
Pjesë e provave ishte edhe ekspertiza e autopsisë, sipas së cilës vdekja e Auronit erdhi si pasojë e gjakderdhjes dhe ciklit të ndryshimeve fiziologjike që ka pamundësuar rikthimin e funksionit të organeve vitale.
