Irani ka njoftuar të hënën se ka arritur një mirëkuptim me Omanin për mënyrën e tranzitit të anijeve nëpër Ngushticën e Hormuzit.
Zëdhënësi i Ministrisë së Jashtme iraniane, Esmail Baghaei, deklaroi në Teheran se palët kanë rënë dakord për një “hartë të rrugës së tranzitit”, por pa dhënë detaje të mëtejshme.
“Është arritur një mirëkuptim në lidhje me hartën e rrugës së tranzitit. Por ne kishim planifikuar, dhe ende planifikojmë, ta finalizojmë mirëkuptimin në formën e një pakete: Harta plus një deklaratë të përbashkët”, tha Baghaei.
Sipas detajeve të bëra publike më herët, plani parashikon që anijet të hyjnë në ngushticë përmes një rruge pranë brigjeve iraniane dhe të dalin përmes një rruge pranë Omanit.
Gjatë periudhës së ndërmjetme, anijet pritet të kalojnë në tranzit pa paguar tarifa apo taksa.
Ndërkohë, presidenti amerikan Donald Trump ka reaguar të hënën, duke kërcënuar se do të bombardojë Omanin nëse vendi pengon marrëveshjen me Iranin.
Trump i ka bërë gjithashtu thirrje Teheranit që të dorëzohet.
Komentet vinë ndërsa ka skaduar afati 60-ditor i vendosur për arritjen e një marrëveshjeje që do t’i jepte fund luftës, ende pa shenja për një marrëveshje mes Shteteve të Bashkuara dhe Iranit.
Zyrtarët iranianë e kanë cilësuar këtë afat si të parëndësishëm, duke akuzuar Uashingtonin se e ka shkelur marrëveshjen që në fillim.
Irani mbylli ngushticën, përmes së cilës kalonin afërsisht një e pesta e furnizimeve të tregtuara me naftë në botë para luftës, pasi Izraeli dhe SHBA-të sulmuan vendin më 28 shkurt.
Kjo bllokadë ka shkaktuar probleme të mëdha për furnizimin global me energji dhe tronditje në tregjet ndërkombëtare.
