Një zjarr masiv ka përfshirë rezervatin natyror High Fens në Belgjikën lindore, duke djegur rreth 30 kilometra katrorë.
Zjarri, një nga më të mëdhenjtë në Belgjikë në vitet e fundit, ka sjellë evakuimin e rreth 600 banorëve në komunat Waimes dhe Bütgenbach, pranë kufirit me Gjermaninë.
Banorëve iu kërkua të largoheshin të shtunën, pasi ndryshimi i drejtimit të erës përhapi tymin drejt zonave të banuara.
Autoritetet u kanë bërë thirrje edhe turistëve të largohen nga zona.
Më shumë se 250 pjesëtarë të emergjencave po marrin pjesë në përpjekjet për shuarjen e zjarrit, raporton AP.
Në operacion marrin pjesë mbi 100 zjarrfikës belgë dhe gjermanë, së bashku me policinë, ushtrinë dhe ekipet e mbrojtjes civile.
Për shuarjen e flakëve po përdoren edhe helikopterë nga Belgjika dhe Holanda.
Policia federale belge ka vendosur gjithashtu katër mjete me topa uji, të afta të transportojnë deri në 9 mijë litra ujë secila.
“Pra, në fakt, kemi një nga zjarret më të mëdha, më të mëdha sesa ato që patëm vitet e fundit në hapësirë të hapur, apo edhe në shekullin e kaluar në Belgjikë, mund të them. Dhe ne si oficerë policie, duhet ta rrethojmë atë, duhet ta bëjmë të mundur punën për zjarrfikësit dhe për ekipet e shpëtimit”, tha Harry Meyer, drejtor i policisë federale.
Autoritetet thanë se deri të dielën në mëngjes asnjë shtëpi nuk ishte prekur nga zjarri.
Megjithatë, flakët vazhdojnë të jenë aktive në disa zona, ndërsa tymi i dendur mbulon pjesë të rezervatit.
Autoritetet u kanë kërkuar qytetarëve të qëndrojnë larg zonës, në mënyrë që të mos pengojnë ekipet e emergjencës./teve1.info/
