Kryetari i Aleancës, Ardian Gjini ka ngritur shqetësimin për gjendjen energjetike në Kosovë, duke deklaruar se vendi po përballet me mungesë të prodhimit dhe kosto të larta të importit të energjisë elektrike.
Në një konferencë për media, Gjini ka bërë të ditur se vetëm gjatë muajit shtator, sipas tij, importi i energjisë elektrike ka kushtuar rreth 27 milionë euro.
Ai ka paralajmëruar se shpenzimet ditore për import mund të arrijnë së paku në dy milionë euro.
“Duhet me ju thënë që importi i energjisë elektrike deri tani është diku 27 milionë euro. Këtë veç prej shtatorit jemi duke folur. Duhet me ju thënë që e kemi prodhimin e energjisë elektrike diku në 372 megavat tash e kërkesën në këto momente e kemi mbi 800 megavat. Do të thotë momentet kur nuk pritet me pas shumë kërkesë. Është kërkesë e ulët. Mundet me shkua shumë më lart. Që do të thotë po mbërrijmë minimum me importua energji elektrike 2 milion euro në ditë”, deklaroi ai.
Sipas shifrave të prezantuara nga Gjini, prodhimi vendor në momentin e deklarimit ishte rreth 372 megavatë, ndërsa kërkesa për energji elektrike tejkalonte 800 megavatë.
Kreu i Aleancës ka kritikuar Qeverinë edhe për procesin e tenderimit për riparimin e bojlerit të njërit prej blloqeve prodhuese, duke pretenduar se procedura është mbyllur pa përzgjedhjen e një fituesi dhe se kjo ka vonuar riparimin.
Gjini ka akuzuar Qeverinë për keq menaxhim të sektorit të energjisë, ndërsa ka paralajmëruar se Aleanca do të kërkojë interpelancë në Kuvendin e Kosovës javën e ardhshme për të diskutuar këtë çështje.
Ai ka theksuar se kostot e importit rëndojnë mbi qytetarët, si përmes faturave të energjisë elektrike, ashtu edhe përmes shpenzimeve që mbulohen nga buxheti i shtetit.
“Më duhet me ju thënë që Kosova, thashë, është në kolaps. Edhe një herë: pas shumë viteve, me një import brutal të energjisë elektrike, me çmime brutale, çmime të cilat në fund të fundit të gjitha paguhen prej xhepave të qytetarëve të Kosovës. E dimë që ka shumë kamuflime, e dimë që shumë çka sikur në raste të tjera, unë e përdor një fjalë “pështjellët” në Kosovë, ama duhet me e potencua pastër. Që do të thotë që paguhet për energji elektrike, del prej xhepave të qytetarëve të Kosovës. Qoftë përmes faturave, qoftë përmes pagesave skandaloze prej buxhetit të Kosovës, për shkak se edhe buxheti i Kosovës, vjen prej xhepave të qytetarëve të Kosovës përmes taksave, të cilat ju merr shteti. E dini që Kurti ka dalë në Kuvend të Kosovës para nja 3 viteve, edhe ju ka mbajtur ligjëratë deputetëve dhe qytetarëve të Kosovës për bojlerat edhe për filterat. E tash po ju tregoj diçka. Këta e kanë dështuar me qëllim tenderin e riparimit të bojlerave, bojlerit. I cili ka pas me u riparua deri në fund të këtij viti, e kanë hapur tenderin, e kanë mbyllur tenderin pa fitues, për me i zbulua çmimet e ofertave që është aferë korruptive brutale, kanë marrë ankesa edhe ai bojleri i Kurtit është i pariparuar. Që ai i njëjti bojler për të cilin ka folur para nja 2 vjet e gjysmë…. Aleanca do të kërkoj interpelancë nga Qeveria e Kosovës për këtë çështje” tha Gjini./teve1.info/
