Ministria e Jashtme e Turqisë thotë se sulmet vdekjeprurëse të vazhdueshme të Izraelit në Gaza tregojnë se qeveria e kryeministrit izraelit Benjamin Netanyahu nuk ka ndërmend të bëjë paqe me palestinezët.
“Objektivi i vetëm i Netanyahut është të zhvendosë palestinezët nga atdheu i tyre dhe të parandalojë vendosjen e paqes dhe stabilitetit në rajon”, tha ministria në një deklaratë, citon Al Jazeera.
Aty thuhej se Netanyahu vazhdon të ndërmarrë hapa që dëmtojnë ekuilibrin e brishtë rajonal dhe sabotojnë përpjekjet e ndërmjetësimit të udhëhequra nga vendet, veçanërisht SHBA-të.
“Është bërë e domosdoshme që bashkësia ndërkombëtare të miratojë një qëndrim më të vendosur, të qëndrueshëm dhe të fuqishëm kundër qasjes ekspansioniste dhe militariste të Netanyahut, e cila synon ta kthejë të gjithë Lindjen e Mesme në një zonë konflikti”, shtoi deklarata.
Kurse, grupi palestinez Hamasi ka thënë se “përshkallëzimi i qëllimshëm” i sulmeve të Izraelit në enklavë synon “të pengojë marrëveshjet e arritura me ndërmjetësuesit, përfshirë administratën amerikane, për të përfunduar zbatimin e marrëveshjes së armëpushimit”
Forcat izraelite vranë të paktën 19 palestinezë në Gaza të dielën, pavarësisht se SHBA-të njoftuan një plan të përshkruar si një “hap monumental” drejt paqes dhe sigurisë në enklavë.
