Kontejnerët e mbeturinave janë vetëm pak metra larg, por kjo nuk i ka penguar disa banorë të rrugës “Nebih Gashi”, në lagjen Emshir të Prishtinës, që mbeturinat t’i hedhin anash rrugës.
Kjo hapësirë është mbushur me mbeturina, ndërsa e njëjta gjendje është edhe në një rrugë të shkurtër alternative, të krijuar nga vetë banorët.
Për ta ndryshuar këtë gjendje, organizata “Let’s Do It Kosova” u bëri thirrje banorëve që t’i bashkohen aksionit për pastrimin e kësaj hapësire.
“Ka një javë që kemi bo thirrje së bashku me banorët këtu ta largojmë këtë sasi të madhe të mbeturinave, të cilat janë afër rrugës kryesore, madje afër bizneseve të njohura të Prishtinës. Është e pakuptueshme se si është e mundur të normalizohet në këtë formë”, tha Luan Hasanaj nga “Let’s Do It Kosova”.
Por, pavarësisht thirrjes së organizatës dhe vetë banorëve në rrjetet sociale, në aksion nuk u bashkua askush nga ta.
“Ajo çka po më shqetëson është që, përkundër thirrjes që ne u kemi bo banorëve dhe përkundër thirrjes që edhe ata e kanë bo vetë nëpër rrjetet sociale, faqet e lagjes, sot askush prej tyre nuk na është bashkuar neve në këtë aksion dhe kjo në të vërtetë është për keqardhje”, deklaroi Hasanaj.
Megjithatë, pas rreth dy orësh punë, vullnetarët arritën t’i mbushnin thasët me mbeturina dhe ta pastronin tërësisht këtë hapësirë.
Kontejnerët që në mëngjes ishin bosh, pas aksionit u mbushën plot.
Në këtë aksion, organizatës “Let’s Do It Kosova” i doli në ndihmë edhe kompania e pastrimit.
