Universiteti i Prishtinës ka vazhduar me organizimin e provimeve pranuese në katër njësi akademike, ku rreth 3 mijë kandidatë iu nënshtruan testimit për t’u bërë pjesë e vitit të ri akademik.
Provimet u zhvilluan në Fakultetin e Edukimit, Fakultetin Ekonomik, Fakultetin e Filologjisë dhe Fakultetin e Inxhinierisë Elektrike dhe Kompjuterike (FIEK).
Për të përcjellë nga afër mbarëvajtjen e procesit, njësitë akademike u vizituan nga prorektoret e Universitetit të Prishtinës, prof. Majlinda Gjelaj dhe prof. Albana Berisha-Qehaja.
Ato u informuan për organizimin e testimeve dhe vlerësuan punën e komisioneve për angazhimin dhe profesionalizmin gjatë zhvillimit të provimeve.
Gjatë vizitës, prorektoret përgëzuan edhe kandidatët për zgjedhjen e Universitetit të Prishtinës, duke theksuar cilësinë e programeve studimore, stafin akademik dhe përgatitjen profesionale që ofron institucioni.
Procesi i provimeve pranuese do të vazhdojë të shtunën, më 11 korrik, në Fakultetin e Mjekësisë, ku kanë aplikuar mbi 2 mijë kandidatë të interesuar për programet e shkencave shëndetësore.
Universiteti i Prishtinës u ka uruar suksese të gjithë kandidatëve, duke shprehur besimin se shumë prej tyre do t’i bashkohen komunitetit akademik si studentë të rinj./teve1.info/
