Mëngjesi i së shtunës nuk qe i zakonshëm për banorët e kësaj ndërtese.
Kjo sepse, qysh në orët e hershme, kati i fundit i këtij objekti në rrugën “Isa Kastrati” në Prishtinë u përfshi nga flakët.
Ngjarje kjo që mobilizoi menjëherë zjarrfikësit, policinë si dhe ekipet e emergjencës.
“Rastin e kemi pranuar në ora 07:28 në mëngjes. Menjëherë të gjitha ekipet që kanë qenë në detyrë, po edhe ekipe të tjera janë angazhuar. Pra për momentin e kemi këtu, prej fillimit brigadën profesionale të zjarrfikësve, policinë e kryeqytetit, ekipet e emergjencës mjekësore, të drejtorisë për siguri dhe emergjenca dhe deri tani, pra sa po flasim, është ora 12:25, që 5 orë jemi këtu dhe për këtë moment është ngjarja e lokalizuar”, tha drejtori për Siguri dhe Emergjenca, Lulëzim Fushtica.
Nga ky zjarr të lënduar mbetën babai e djali pesë vjeç, ku për gjendjen e fëmijës nga Emergjenca thonë se është stabile.
“Është trajtuar në Qendrën e Emergjencës, ende është në observim, gjendja stabile, do të transferohet në Klinikën e Kirurgjisë Plastike për vazhdim të trajtimit”, thuhet nga Qendra e Emergjencës.
Ndërsa ndihmë mjekësore kanë kërkuar edhe pesë zjarrfikës që intervenuan në fikjen e zjarrit.
“I kemi të lënduar, të them, dy qytetarë të cilët kanë qëlluar në ndërtesë, në banesën e tyre. Njëri prej tyre është fëmijë 5-vjeçar, i cili është në emergjencë. Dhe gjatë intervenimeve janë edhe pesë zjarrfikës të cilët kanë kërkuar ndihmë, mirëpo nuk janë lëndime të them të mëdha, po janë lëndime, të them, profesionale gjatë kryerjes së punës së tyre dhe ata të gjithë janë trajtuar nga ekipet e emergjencës që janë në vendin e ngjarjes dhe vazhdojmë ende me punën”, tha Fushtica.
Se hasën në vështirësi në shuarjen e zjarrit tregoi edhe komandanti i zjarrfikësve në Prishtinë, Malë Gashi.
“Sigurisht edhe izolimi e materialeve të ndryshme që janë, ka krijuar temperaturë të lartë. Megjithatë, për momentin gjithçka është në kontroll dhe jemi në përfundim e sipër të këtij zjarri. Meqenëse ky lloj i zjarrit kategorizohet tek zjarret e mëdha, prandaj do shumë kapacitete për të angazhuar personal shumë dhe sigurisht që janë të vështira, sepse dihet që është lartësi dhe janë nën kulme të cilat ka kthina shumë të ndryshme, edhe temperatura krijohet shumë e madhe, gjë që e pamundëson atë reagimin sikur të jetë një një zjarr më i vogël ose në një sipërfaqe të hapur”, tha komandanti i Zjarrfikësve, Malë Gashi.
Në ndihmë zjarrfikësve të Prishtinës, u dolën edhe ata të Lipjanit si dhe Kompania Rajonale e Ujësjellësit “Prishtina”.
Ndonëse shkaktarët e këtij zjarrit janë ende të paqarta, një rast i ngjashëm kishte ndodhur në këtë objekt dy vite më parë.
