Po qëndron i parkuar në stacionin e autobusëve.
Por ky autobus nuk do të jetë në radhë për bartjen e udhëtarëve në komunën e Malishevës.
Ndaj të njëjtit, mesditën e së enjtes pati gjuajte me armë zjarri në fshatin Pagarushë.
Madje në pamje duket se dy prej plumbave qëlluan pjesën e shoferit.
Fatmirësisht nga ky rast, nuk pati asnjë të lënduar, ndonëse brenda autobusit ndodheshin udhëtarët.
E në vendin e ngjarjes, u panë edhe copëza të dritares.
Por televizioni mëson se në mes të dyshuarit dhe viktimës kishte disa probleme rreth bartjes së udhëtarëve.
Që të dy punonin me linjë të autobusëve ne fshatrat për rreth komunës së Malishevës.
E personit që u arrestua, policia konfirmuan se iu konfiskua edhe arma AK-47, e cila dyshohet të jetë përdorur në këtë sulm të rëndë.
“Rreth orës 12:10, është pranuar një informacion lidhur me një sulm me armë zjarri në drejtim të një autobusi në fshatin Pagarushë të Malishevës, me ç’rast njësitë përkatëse policore kanë reaguar menjëherë duke dalë në vendin e ngjarjes. Si rezultat, personi i dyshuar është arrestuar dhe, në koordinim me prokurorin e shtetit, është ndaluar për 48 orë, si dhe është sekuestruar një armë e llojit AK-47”, ka njoftuar Policia.
Rrethanat e rastit tashmë po hetohen nga Prokuroria Themelore e Gjakovës.
“Me vendim të Prokurorit të Shtetit, personi i dyshuar me inicialet S.M., është ndaluar për 48 orë, për shkak të dyshimit të bazuar se ka kryer veprat penale “Vrasja e rëndë në tentativë” dhe “Mbajtja në pronësi, kontroll ose posedim të paautorizuar të armëve” sipas Kodit Penal të Republikës së Kosovës.Prokurori i Shtetit, brenda afatit ligjor, do të paraqesë në gjykatën kompetente kërkesën për caktimin e masës së paraburgimit ndaj të dyshuarit”, thuhet nga Prokuroria.
Televizioni provoi të marrë një qëndrim edhe nga pronari i autobusit i cili është sulmuar, por i njëjti ishte i paqasshëm.
Para katër vitesh, një rast i ngjashëm ndodhi edhe në Gllogjan të Deçanit, ku tre persona mbetën të vrarë, pasi autobusi me nxënës u sulmua nga persona të maskuar.
