Gjykata Supreme e Kosovës ka shpallur të paligjshme dhe ka shfuqizuar disa dispozita të Udhëzimit Administrativ të Ministrisë së Punëve të Brendshme që ndalonin vendosjen e materialeve errësuese në xhamat e automjeteve.
Vendimi erdhi pas padisë së paraqitur nga Organizata Joqeveritare “Marakli t’Kerreve” dhe Instituti “TriPika – Sport, Sociale, Ekonomi”, të cilët kërkuan shqyrtimin e ligjshmërisë së dispozitave që ndalonin përdorimin e xhamave dhe folieve errësuese në automjete.
Sipas Gjykatës Supreme, ligjet në fuqi për trafikun rrugor dhe automjetet nuk parashohin ndalim të përgjithshëm për vendosjen e materialeve errësuese apo zëvendësimin e xhamave me xhama të errësuar. Përkundrazi, legjislacioni lejon modifikime në automjete, me kusht që ato të kalojnë procedurat përkatëse të verifikimit teknik dhe atestimit.
Gjykata vlerësoi se dispozitat e shfuqizuara krijonin kufizime të reja që nuk ishin të parapara me ligj, duke lejuar xhamat e errët vetëm për automjetet që i kishin të instaluara nga prodhuesi dhe duke ndaluar në mënyrë të përgjithshme vendosjen e folieve errësuese.
Në arsyetimin e saj, Gjykata theksoi se aktet nënligjore mund të shërbejnë vetëm për zbatimin dhe konkretizimin e ligjit, por jo për vendosjen e ndalimeve apo kufizimeve të reja pa bazë të qartë ligjore.
Po ashtu, Gjykata konstatoi se dispozitat e kontestuara krijonin trajtim të ndryshëm për automjete që ndodheshin në situata të krahasueshme, pa një justifikim të mjaftueshëm ligjor dhe pa dëshmuar nevojën për një dallim të tillë në funksion të interesit publik.
Ndërkohë, paragrafi 2 i nenit 7 ka mbetur në fuqi, pasi sipas Gjykatës ai ka karakter teknik dhe administrativ, duke rregulluar vetëm evidentimin e xhamave të errët në dokumentacionin e regjistrimit të automjetit, pa vendosur kufizime që bien ndesh me ligjin.
Ky vendim pritet të ketë ndikim të drejtpërdrejtë tek pronarët e automjeteve që dëshirojnë të vendosin xhama ose folie errësuese, duke rikthyer mundësinë e modifikimeve të tilla në përputhje me procedurat ligjore dhe standardet teknike në fuqi.
