Kombëtarja e Shqipërisë në futboll, të enjten ka zhvilluar seancën e radhës stërvitore në kuadër të përgatitjeve për miqësoren e dytë me Luksemburgun.
Të mërkurën mbrëma, Shqipëria u mposht në Tiranë 1:0 nga Izraeli në miqësoren e parë dhe debutimin e selektorit Rolando Maran.
Në stërvitjen pas ndeshjes, ekipi është ndarë në dy grupe, ku lojtarët që luajtën ndaj Izrealit patën seancë rikuperimi kurse të tjerët u stërvitën normalisht.
Sulmuesi Myrto Uzuni nuk është stërvitur me ekipin, pasi gjendja e tij po vlerësohet pas situatës gripale sikurse edhe Anis Mehmeti.
Stërvitjen e radhës, Shqipëria do ta zhvillojë të premten nga ora 17:30 në stadiumin “Air Albania” kurse selektori Maran do të paraqitet para mediave në konferencën zyrtare.
Ndeshja Shqipëri – Luksemburg, luhet të shtunën mbrëma në Tiranë, me fillim nga ora 20:00.
