Analisti politik Selam Shkodra e ka cilësuar të pamundur ndryshimin e ligjit për Dhomat e Specializuara të Kosovës në Hagë.
Duke komentuar nismën e Partisë Demokratike të Kosovës për ndryshimin e këtij ligji, të dorëzuar të hënën në Kuvendin e Kosovës, Shkodra ka thënë se kjo nismë vjen në një moment të ndjeshëm, por sipas tij nuk pritet të ketë rezultat.
“Është një veprim në një kohë shumë delikate. Megjithatë, unë mendoj që nuk do të ketë ndonjë epilog pozitiv, sepse edhe Bedri Hamza, edhe gjithë eksponentët e tjerë të PDK-së dhe të skenës politike e dinë që është e pamundur ndryshimi i ligjit për Gjykatën Speciale”, ka deklaruar Shkodra në emisionin “Këndi i Debatit” në Tëvë1.
Ai ka thënë se struktura dhe përmbajtja e ligjit janë ndër arsyet kryesore që, sipas tij, e bëjnë të pamundur një ndryshim të tillë.
Shkodra ka veçuar edhe kompetencat e panelit kushtetues brenda Dhomave të Specializuara, duke argumentuar se çështjet që lidhen me veprimtarinë e këtij institucioni shqyrtohen brenda strukturës së tij.
“Gjykata Speciale ka edhe një panel të Gjykatës Kushtetuese, që të gjitha çështjet që kanë të bëjnë me veprimet e Gjykatës Kushtetuese dhe me materien e saj i vendos ai panel i Gjykatës Speciale”, ka thënë ai.
Sipas Shkodrës, ligji përcakton gjithashtu se proceset që zhvillohen në Dhomat e Specializuara nuk i nënshtrohen gjykatave vendore, përfshirë Gjykatën Kushtetuese.
“Madje është në epërsi në raport me të gjitha gjykatat vendore, andaj unë e shoh si të pamundur”, ka përfunduar Shkodra./teve1.info/
