Kryetari i Aleancës për Ardhmërinë e Kosovës, Ramush Haradinaj, ka kujtuar Dëshmorët dhe Martirët e Deçanit në Ditën e Përkujtimit, duke shprehur respekt dhe mirënjohje për sakrificën e tyre në rrugën drejt lirisë së Kosovës.
Përmes një reagimi publik, Haradinaj vlerësoi rolin historik të Deçani, duke theksuar se ky qytet ka qenë ndër vite në vijën e parë të përpjekjeve për liri dhe ka dhënë shumë figura patriotike në periudha të ndryshme.
“Sot, në Ditën e Përkujtimit të Dëshmorëve dhe Martirëve të Deçanit, përulemi me respekt para sakrificës së tyre, me mirënjohje dhe falënderim të përjetshëm”, ka deklaruar ai.
Haradinaj theksoi se kujtimi për ata që dhanë jetën për lirinë duhet të mbetet i gjallë brez pas brezi, duke përfunduar mesazhin e tij me nderime për të gjithë të rënët. “Lavdi të rënëve ndër breza!”, u shpreh ai./teve1.info/
