Gjykata Supreme e Kosovës ka shpallur të paligjshëm dhe ka shfuqizuar nenin 21 të Rregullores (QRK) Nr.19/2024 për Procedurat e Përzgjedhjes dhe Emërimit të Drejtorëve dhe Zëvendësdrejtorëve, Mësimdhënësve, Bashkëpunëtorëve Profesionalë, Asistentëve, Instruktorëve dhe Sekretarëve në institucionet publike edukativo-arsimore dhe aftësuese të arsimit parauniversitar.
Sipas njoftimit të Gjykatës Supreme, Kolegji i Gjykatës ka vendosur në çështjen juridike të konfliktit administrativ sipas padisë së Këshillit Drejtues të ShFMU “Xhavit Ahmeti”, kundër Qeveria e Republikës së Kosovës dhe Ministria e Arsimit, Shkencës, Teknologjisë dhe Inovacionit, lidhur me shfuqizimin e nenit 21 të kësaj rregulloreje.
“Pas shqyrtimit gjyqësor publik, është aprovuar si e themeltë kërkesëpadia e paditësit”, thuhet në njoftim.
Gjykata ka bërë të ditur se neni 21 i Rregullores Nr.19/2024, e miratuar me Vendimin Nr.03/212 të datës 10 korrik 2024, është shpallur i paligjshëm dhe është shfuqizuar, ndërsa është refuzuar kërkesa për caktimin e masës së përkohshme të sigurimit.
Sipas Gjykatës Supreme, Qeveria ka pasur kompetencë kushtetuese dhe ligjore për nxjerrjen e rregullores, por dispozita e kontestuar nuk ka qenë në përputhje me nenin 35, paragrafi 4 të Ligjit për Arsimin Parauniversitar në Republikën e Kosovës.
“Ligji për Arsimin Parauniversitar, si ligj i veçantë (lex specialis), përcakton qartë se përzgjedhja e mësimdhënësve bëhet nga një komision i themeluar nga Drejtoria Komunale e Arsimit, ku përfshihen edhe drejtori i institucionit arsimor dhe përfaqësuesit e Këshillit Drejtues”, thuhet në arsyetimin e Gjykatës.
Sipas vendimit, neni 21 i Rregullores kishte ndryshuar këtë përbërje duke përjashtuar drejtorin e shkollës dhe përfaqësuesit e Këshillit Drejtues, gjë që, sipas Gjykatës, bie ndesh me dispozitat ligjore në fuqi dhe me parimin e hierarkisë së akteve juridike.
“Rregullorja në fjalë, respektivisht neni 21 i saj, rezulton se është në kundërshtim me dispozitat ligjore në fuqi, pasi ndryshon përbërjen e organit vendimmarrës të përcaktuar me ligj”, thuhet më tej në njoftim.
Gjykata Supreme ka theksuar se aktet nënligjore duhet të jenë në funksion të zbatimit të ligjit dhe nuk mund të ndryshojnë apo kufizojnë dispozitat e përcaktuara me ligj.
