Para orës 16:00 filluan të mblidhen në selinë e partisë.
Kjo meqë anëtarët e kryesisë së Partisë Demokratike të Kosovës, pasditen e së hënës u thirrën për një takim.
E kryetema e kësaj mbledhje, ishte kërkesa e kreut të Nismës Socialdemokrate, Fatmir Limajt për pjesëmarrjen në listën zgjedhore të PDK-së.
Për këtë çështje, shumë nga anëtarët e kryesisë, refuzuan të flasin para mbledhjes.
“Ta shohim nëse e qet kryetari i partisë letrën që na ka dërguar ai ( Fatmir Limaj). E diskutojmë në parti…”, ka thënë Bashota.
“Se çka ka mu diskutua nuk e dimë se nuk e kemi parë agjendën. Besoj që do të jetë. Kjo nuk është çështje personal ta shohim se çka do të vendos kryesia”, u shpreh Totaj.
Pas afër 2 orësh, mbledhja përfundoi.
E para gazetarëve, doli vet kryetari, Bedri Hamza.
Ky i fundit, fillimisht pati fjalë të mëdha për ish-numrin dy të PDK-së.
“E kam mik, kam punuar gjatë më të, kam vlerësim shumë pozitiv shumë për z. Limaj është disktuar në Partin Demokratike është vendim i përgjithshëm që e presim edhe mirëpresim kontributin e z. Limaj, kryetarit të Nismas Socialdemokrate që në këto zgjedhje do të japin Partisë Demokratike dhe jam i bindur që kjo përkrahje do të reflektojë në rritjen e votës për PDK”, ka thënë Hamza.
Pas kësaj, Hamza e bëri të ditur se angazhimin politike të Limajt e duan në parti, por jo edhe përfshirjen brenda listës për deputetë.
“Sigurisht që z.Limaj në të ardhmen në proceset e rregullta të brendshme zgjedhore është i mirëpritur që të jetë pjesë e PDK-së. Sa i përket garimit në këtë listë është qëndrim i përgjithshëm që fillimisht duhet të ndodhë një përkrahje për PDK-në, një vullneti i mirë nga ana e NISMËS Socialdemokrate dhe pastaj në zgjedhjet e ardhshme do të trajtojmë në mënyrë më të duhur. Por kësaj radhe z. Limaj nuk do të jetë pjesë e listës së PDK-së”, ka përfunduar Hamza.
Hamza në fund sqaroi se vet Limaj nuk e ka theksuar dëshirën të jetë pjesë e listës së PDK-së në zgjedhjet e 7 qershorit.
Ndërsa nuk ka dhënë një emër nëse kjo parti ka një kandidat për president, me arsyetimin se zgjedhjet janë parlamentare.
