Pavijoni i Republikës së Kosovës u hap zyrtarisht më 6 maj 2026 në kuadër të edicionit të 61-të të Ekspozitës Ndërkombëtare të Artit – La Biennale di Venezia, duke prezantuar veprën “Hard Teeth” (“Dhëmbë të Fortë”) të artistit Brilant Milazimi.
Projekti është kuruar nga José Esparza Chong Cuy, ndërsa komisionere është Hana Halilaj, në përfaqësim të Galerisë Kombëtare të Kosovës.
Sipas Ministrisë së Kulturës dhe Turizmit, pavijoni është vendosur në kishën Santa Maria del Pianto, duke shënuar aktivizimin e parë kulturor të kësaj hapësire pas më shumë se gjysmë shekulli.
“E projektuar nga Francesco Contin dhe e përfunduar në vitin 1658, kisha e vendos ekspozitën brenda një historie më të gjatë të ndërprerjeve dhe rikuperimit. Hard Teeth shpaloset si një pikturë panoramike 17-metërshe që paraqet një varg të zgjatur trupash në një gjendje pritjeje që duken njëkohësisht të brishtë dhe këmbëngulës, duke mbajtur tension në qetësi. Vepra reflekton mbi pritjen si një kusht që strukturon jetën nëpër gjeografi të ndryshme, duke evokuar radhë të formuara nga lufta, zhvendosja dhe kontrollet burokratike si një eksperiencë e përbashkët globale. Ekspozita “Dhëmbë të Fortë” shoqërohet nga një punë tingullore e kompozuar nga Liburn Jupolli”, thuhet në njoftim.
Ceremonia e hapjes mblodhi artistë, kuratorë, përfaqësues institucionalë dhe publik ndërkombëtar, duke e kthyer pavijonin e Kosovës në një pikë takimi dhe shkëmbimi kulturor brenda kuadrit të Bienales së Venecias.
Pjesëmarrja e Kosovës në La Biennale di Venezia vazhdon të forcojë prezencën e artit bashkëkohor kosovar në arenën ndërkombëtare, duke ruajtur një vijimësi të dukshme të angazhimit kulturor ndër vite./teve1.info/
