Prokuroria Themelore në Ferizaj ka hapur rast për veprën penale “Vrasja e foshnjes gjatë lindjes”, lidhur me dyshimin se një 21-vjeçare ka privuar nga jeta foshnjën e saj.
Lajmin për Tëvë1 e ka konfirmuar zëdhënësja e Prokurorisë, Vjosa Baftiu, e cila bëri të ditur se trupi i pajetë i foshnjës është dërguar për obduksion në Instituti i Mjekësisë Ligjore.
“Lidhur me rastin qe biseduam paraprakisht, ju njoftojme se me vendim te Prokurorit te Shtetit, trupi i pajete i foshnjes eshte derguar per obduksion ne Institutin e Mjekesise Ligjore ne Prishtine. Prokuroria eshte njoftuar per rastin dhe jane duke u ndermarr veprimet e nevojshme hetimore. Rasti eshte hapur ne drejtim te vepres penale ‘Vrasja e foshnjes gjate lindjes’ nga neni 176 te Kodit Penal te Republikes se Kosoves”, ka deklaruar Baftiu.
Sipas Prokurorisë, hetimet janë në vazhdim dhe po shqyrtohen të gjitha rrethanat që lidhen me rastin, me qëllim të zbardhjes së plotë të ngjarjes.
Lidhur me rastin ka folur edhe drejtoresha e spitalit, Minire Aliaj, e cila ka dhënë detaje për mënyrën se si ka ndodhur ngjarja.
“Pacientja me inicialet F.M. nga Prelezi ka ardhur në Emergjencën e Ferizajt me ankesa për obstipacion dhe gjakderdhje nga zorra e trashë, e shoqëruar nga motra, nëna dhe babai. Menjëherë pasi ka ardhur, ajo ka kërkuar të hyjë në tualet, ku më pas ka kryer lindjen. Pastaj dera është hapur nga jashtë nga stafi dhe familjarët. Kur kanë hyrë brenda, foshnja është gjetur në një shportë, e ndarë nga kordoni ombilikal nga vetë pacientja. Foshnja ka qenë në hipotermi, e ftohtë, me tonus nën 100 dhe saturim nën 60. Është tentuar reanimimi emergjent, por foshnja nuk ka arritur të mbijetojë”, ka deklaruar Aliaj.
Ajo shtoi se, sipas neonatologes, foshnja kishte shenja të ngufatjes.
“Sipas neonatologes, foshnja kishte shenja të ngufatjes dhe dyshohet se pacientja i ka lëshuar ujë në banjo, duke e ftohur shumë foshnjën”, ka thënë Aliaj.
