Policia e Kosovës ka njoftuar për arrestimin e të dyshuarit të dytë lidhur me rastin e vrasjes që ndodhi më 5 maj në Gjakovë.
Sipas raportit 24-orësh të Policisë, pas veprimeve hetimore është identifikuar dhe arrestuar një person i dyshuar, i cili pas intervistimit është dërguar në mbajtje për 48 orë me vendim të prokurorit.
Rasti po hetohet nën dyshimet për veprat penale “Vrasje” dhe “Pjesëmarrje në rrahje”.
“Pas një pune hetimore në lidhje me rastin është identifikuar dhe arrestuar i dyshuari i dytë mashkull kosovar dhe i njëjti pas intervistimit me vendim të prokurorit dërgohet në mbajtje për 48 orë”, thuhet në raportin e Policisë.
I dyshuari i parë për rastin ishte vetëdorëzuar në polici më 5 maj.
Ndryshe, sipas hetimeve fillestare, viktima dyshohet se është sulmuar me thikë pas një mosmarrëveshjeje në rrugën “Mbretëresha Teutë” në Gjakovë, rreth orës 02:20 të mëngjesit.
I plagosuri fillimisht ishte dërguar për trajtim në Qendrën Kryesore të Mjekësisë Familjare, e më pas në Spitalin e Përgjithshëm në Gjakovë, ku më vonë ka ndërruar jetë.
Policia ka bërë të ditur se hetimet për rastin janë ende në vazhdim.
“Bazuar në hetimet fillestare, dyshohet se rreth orës 02:20, pas një mosmarrëveshjeje në rrugën “Mbretëresha Teutë” në Gjakovë, viktima është sulmuar me mjet të mprehtë nga një person tjetër i moshës madhore, i cili më pas është larguar nga vendi i ngjarjes. Njësitë relevante policore kanë reaguar menjëherë, duke dalë në vendin e ngjarjes dhe, në konsultim me Prokurorin e Shtetit, është iniciuar rasti “Vrasje”. Si rezultat i veprimeve hetimore, janë identifikuar dy persona të dyshuar. Njëri prej tyre, me inicialet Q. S., rreth orës 09:45 është vetëdorëzuar në polici dhe, me vendim të prokurorit të shtetit, është ndaluar në mbajtje për 48 orë”, thuhej në njoftimin fillestar.
