Kuvendi i Kosovës ka rinisur seancën për zgjedhjen e presidentit të ri, ndërsa mungesa e deputetëve opozitarë ka bërë që ajo të shtyhet disa herë gjatë ditës.
Seanca ishte paraparë të niste në orën 10:00, por kryetarja e Kuvendit, Albulena Haxhiu, e shtyu për në orën 14:00, me arsyetimin se dëshironte t’i jepte kohë opozitës për të marrë pjesë.
Në nisje të seancës së dytë, Haxhiu u bëri sërish thirrje deputetëve opozitarë që të jenë të pranishëm në sallë dhe të marrin pjesë në votim, duke u thirrur në detyrimet që rrjedhin nga aktgjykimet dhe Ligji për Deputetët.
Sipas këtij ligji, deputetët kanë obligim të marrin pjesë në seanca dhe të njoftojnë kryetarin e Kuvendit për mungesat e tyre.
“I lus ata që të vijnë në këtë seancë, ku si pikë e rendit të ditës është zgjedhja e Presidentit të Republikës së Kosovës”, tha Haxhiu.
Megjithatë, për shkak të mungesës së opozitës, seanca u ndërpre sërish.
Kryeparlamentarja njoftoi se ajo do të vazhdojë në orën 19:00.
“Në këto rrethana, për shkak të mungesës së opozitës dhe në përpjekje që ajo të jetë e pranishme në seancën për zgjedhjen e Presidentit të Republikës së Kosovës, si për obligimet kushtetuese ashtu edhe për interesin publik, ju njoftoj se kjo seancë vazhdon sot në orën 19:00”, deklaroi ajo.
Deputetët e partive opozitare nuk morën pjesë fare në seancën e sotme, duke vazhduar bojkotin e tyre.
Ata kishin bojkotuar edhe seancën e 27 prillit, në të cilën Lëvizja Vetëvendosje propozoi dy kandidate për presidente: Feride Rushitin dhe Hatixhe Hoxhën.
Ndonëse pa kuorumin e nevojshëm, votimi u zhvillua, ku Rushiti mori 63 vota në rundin e parë, ndërsa Hoxha nuk mori asnjë votë.
Një votë rezultoi e pavlefshme.
Kryeministri Albin Kurti, njëherësh kryetar i Lëvizjes Vetëvendosje, ka zhvilluar disa takime me përfaqësues të opozitës në përpjekje për të arritur një marrëveshje për çështjen e presidentit, por pa rezultat.
Opozita i ka cilësuar si joserioze dhe të papranueshme ofertat e Kurtit si për pjesëmarrje në Qeveri, ashtu edhe për postin e kryeparlamentarit, duke iu përgjigjur me bojkot./teve1.info/
