Klasat kanë mbetur të boshatisura.
Në shkollën që për vite mësuan gjenerata të shumta më nuk dëgjohet zhurma e nxënësve.
Kjo pasi ka disa muaj që shkolla e fshatit Baks të Skenderajt nuk është më funksionale.
Dyer e shkollës së fshatit Baks janë mbyllur që nga shtatori i vitit të kaluar. Kjo pasi komuna e Skenderajt vendosi ta mbyllë këtë shkollë pas rënies së numrit të nxënësve.
Mbyllja e këtij institucioni arsimor ka mërzitur banorët e fshatit.
“Ka ra gjallëria… unë çdo mëngjes vijë këndej për më shku tek puna në maketë, por kur vijë këtu nuk mundem me pranu që nuk ka më nxënës në këtë shkollë është shumë e dhimbshme, kanë luajtur nxënësit këtu, ka pasur gjallëri tash është heshtje totale në fshatin tonë”, thotë Asllan Selmanosmai, banor i fshatit.
E nga këtu nxënësit e Baksit, detyrohen të shkojnë në shkollën e fshatit Qirez.
“Shumë më problem dhe njëkohësisht rrezik, pasi deri tek shkolla i kanë minimumi tri kilometra, herë po detyrohem me disa komba me pagu ose edhe në këmbë më shku. Pra është shumë në rrezik”, tregon ky banor.
E shkolla “Dëshmorët e Qyqavicës” në Qirez, nuk po shërben vetëm për nxënësit e Baksit.
Edhe nxënësit nga fshatrat e tjera përreth, për shkak të mbylljes së shkollave, mësimet po i ndjekin këtu.
Drejtori i kësaj shkolle shpreh shqetësim largimin e nxënësve nga fshatrat.
“Shqetësuese është shumë pasi ka nxënës që po migrojnë jashtë, pra prindërit e tyre kanë shkuar më herët dhe tash po i marrin edhe fëmijët e tyre, por kemi që po gravitojnë edhe në për qytete. Ne kemi këtu disa shkolla që janë mbyllur kemi shkollën e Krasmirovcit, Dashevcit e Baksit”, thotë Amir Ferati –drejtor i shkollës.
Me largimin e nxënësve, po përballet edhe Qirezi.
Nga shtatori, kësaj shkolle i janë larguar plot 10 nxënës.
Ndërsa në pritje për të migruar jashtë Kosovës, janë edhe tre të tjerë.
“Zakonisht është shumë vështirë më mbajt një orë mësimore, për shkak se numri sa më i vogël i nxënësve aq më të vështirë e bënë zhvillimin e një ore mësimore sa më lartë numri në për klasë është më lehtë edhe për mësimdhënësin edhe për nxënësin pasi bashkëpunimi në klasë është mjaftë efektiv”, shprehet ai.
Aktualisht shkolla “Dëshmoret e Qyqavicës” numëron 187 nxënës, e sipas drejtor brenda çdo viti largohen 15 nxënës.
