Kryeministri i Shqipërisë, Edi Rama, ka nisur këtë të enjte, më 16 prill, vizitën e tij të punës në Romë.
Ai u prit me ceremoni zyrtare nga Kryeministrja e Italisë, Giorgia Meloni, në Pallatin Chigi, rezidenca zyrtare e qeverisë italiane.
“Romë – Ceremonia zyrtare e pritjes nga Kryeministrja e Republikës së Italisë, Giorgia Meloni”, shkruan Rama.
Takimi mes dy krerëve të qeverive është planifikuar të zhvillohet së shpejti, ku pritet të diskutohet mbi çështje të sigurisë dhe bashkëpunimit dypalësh.
Gjatë qëndrimit në Itali, Rama do të ketë edhe një takim me Ministrin e Mbrojtjes, Guido Crosetto, për të forcuar bashkëpunimin në fushën e mbrojtjes dhe sigurisë.
Vizita e tij është pjesë e një turi ndërkombëtar, që do të vijojë më 18 prill në Barcelonë, ku ai do të marrë pjesë në Samitin “Në Mbrojtje të Demokracisë”, me ftesë të kryeministrit spanjoll Pedro Sanchez.
Në Barcelonë, Rama do të diskutojë mbi sfidat e dezinformimit dhe rolin e teknologjisë digjitale, si dhe mbi forcimin e institucioneve demokratike e multilateralizmit. Ai do të zhvillojë takime bilaterale me kryeministrin Sanchez dhe Presidentin e Këshillit Evropian, António Costa./rtsh.al/
