Në radhë të parë u ulën familjarët.
E më pas në sallë zunë vend edhe bashkëveprimtarët e miqtë.
Krejt kjo, pasi të premten u mbajt akademi përkujtimore për të ndjerin Blerim Dervishaj, i cili u nda nga jeta më 27 mars të këtij viti.
Në këtë tubim u kujtua jeta dhe kontributi i tij në rrugën për çlirimin e vendit, nga angazhimi në ilegalen patriotike deri tek pjesëmarrja në radhët e UÇK-së.
Mes kujtimeve dhe fjalimeve, vend të veçantë zunë emocionet e familjarëve.
Fjalët për vëllanë nuk i gjeti lehtë motra Agimja.
“Gjithmonë jemi mburrë me të, dhe me krejt atë që ai ka bë për ne, nuk ka qenë vetëm vëllau jonë por ka qenë më shumë së vëlla, nuk i ka taku vetëm familjes sonë por i ka taku përtej, kështu që veprat të cilat na i ka lonë, na bëjnë krenarë gjithmonë dhe ai vetëm fizikisht nuk është në mesin tonë”, deklaroi motra e Blerim Dervishajt, Agime Veseli.
E në piedestal e ngritën veprimtarinë e Blerimit edhe bashkëveprimtarët e tij.
“Blerimi punoi shumë, që të vendos gjërat në përgatitje në shërbim të luftës së armatosur, Blerimi ishte i zellshëm në këtë drejtim dhe argumentues ishte i ngritur dhe nuk lidhi me emra njerëz partish por me punën me idetë për ndryshimin e gjendjes”, tha bashkëveprimtari, Agron Xhemajli.
“Kur një veprimtar shkëputet nga jeta, në njëfarë mënyre ai merr me vete edhe një pjesë të historisë e aq më tepër dikush i cili ka qenë i heshtur si Blerimi veprimtar i madh por i heshtur”, tha bashkëveprimtari tjetër, Ramadan Avdiu.
Një fjalë rasti e pati edhe kryetari i OVL-UÇK në Podujevë , Rafet Llapashtica.
“Kosova ishte dhe mbetet vend heroizmi dhe trimërie vend i cili lindi bijë të pushkës dhe fjalës që përherë zërin kombit ia quan lart e më lart gjithandej e tillë ishte edhe Blerim Dervishaj”.
Blerimi, që në rini si student, ishte pjesë e Lëvizjes Popullore për Republikën e Kosovës, derisa ishte organizuar edhe në Lëvizjen Kombëtare për Çlirimin e Kosovës, subjekt i cili kishte në program organizimin e luftës së armatosur kundër okupatorit serb.
