Kryetarja e Kuvendit të Republikës së Kosovës, Albulena Haxhiu, së bashku me kryeministrin Albin Kurti dhe kryetarin e Komunës së Kastriotit, Halil Thaçi, mori pjesë në ceremoninë përkujtimore për katër të rënët e familjes Morina, Fejzullah Morina dhe tre djemtë e tij, Lavdimi, Fidaimi dhe Shkëlzeni që u mbajt sot në Milloshevë.
Haxhiu theksoi se, edhe pas më shumë se një çerek shekulli, dhimbja mbetet e gjallë, ndërsa drejtësia ende mungon.
“Edhe pse ka dëshmitarë për atë që ka ndodhur, deri më sot askush nuk është dënuar për këtë krim. Kjo mungesë drejtësie e bën edhe më të rëndë kujtesën për ngjarjen”, tha ajo.
Kryetarja përkujtoi sakrificën e familjes: “Në ato rrethana të vështira për vendin tonë, në kohë lufte, Fejzullahu si prind dhe veprimtar, Lavdimi si luftëtar, ndërsa Fidaimi dhe Shkëlzeni si fëmijë të pafajshëm, dhanë më të shtrenjtën që mund të japë njeriu – jetën e tyre, duke u bërë pjesë e sakrificës së madhe për liri.”
Fidaimi ishte vetëm 14 vjeç dhe Shkëlzeni 10 vjeç. Kryetarja Haxhiu shtoi se fëmijët përbënin mbi 13% të viktimave gjatë luftës në Kosovë, duke theksuar rëndësinë e kujtesës dhe përgjegjësinë për të mos harruar.
“Fejzullahu na kujton jo vetëm dhimbjen e humbjes, por edhe forcën dhe qëndresën që ka karakterizuar familjen Morina dhe popullin tonë në kohë të rënda. Institucionet e vendit kanë detyrim moral që këtë sakrificë ta nderojnë gjithmonë, duke ruajtur kujtesën dhe duke ndërtuar një të ardhme më të mirë, me më shumë drejtësi, paqe dhe dinjitet për të gjithë”, theksoi kryetarja Haxhiu.
