Pas mbledhjes së Qeverisë, ministri i Shëndetësisë, Arben Vitia, ka prezantuar një projekt të ri për ndërtimin e një spitali në Ferizaj.
Ai bëri të ditur se bëhet fjalë për një investim prej rreth 24 milionë eurosh, ndërsa ndërtimi i këtij institucioni shëndetësor pritet të përfundojë brenda 30 muajve.
Sipas Vitisë, spitali do të jetë modern dhe i pajisur me kushte bashkëkohore, duke synuar ofrimin e shërbimeve cilësore për qytetarët e Ferizajt dhe zonave përreth.
Ai theksoi se përfitues të këtij projekti do të jenë edhe banorët e komunave fqinje, si Kaçaniku dhe Hani i Elezit, të cilët do të kenë qasje më të lehtë në shërbime shëndetësore.
Ministri u shpreh se ky projekt pritet të ndikojë ndjeshëm në përmirësimin e sistemit shëndetësor në këtë rajon dhe në ngritjen e cilësisë së trajtimeve për pacientët.
