Eksperti i sigurisë dhe shëndetit në punë, Naim Bajraktari, ka deklaruar se aksidentet në vendin e punës ndodhin në çdo shtet, por në vendet më të zhvilluara ato janë dukshëm më të rralla krahasuar me Kosovën.
Ai thekson se sektori i ndërtimtarisë vazhdon të jetë më i rrezikshmi, duke kërkuar vëmendje të shtuar dhe masa konkrete parandaluese.
Sipas tij, institucionet përgjegjëse në Kosovë janë ende në fazë zhvillimi, duke pasur parasysh se mekanizmat e sigurisë në punë kanë rreth një dekadë funksionimi.
Bajraktari ka theksuar se statistikat e fundit në Kosovë tregojnë një rritje shqetësuese të aksidenteve në vendet e punës.
Sipas ekspertit, gjatë vitit 2025 janë regjistruar 32 raste, krahasuar me 12 raste në vitin 2024. Ndërkohë, vetëm në tre muajt e parë të këtij viti janë shënuar 6 aksidente, duke ngritur alarmin për nevojën urgjente të ndërhyrjes institucionale.
Derisa, eksperti ka bërë thirrje për rritjen e kapaciteteve të inspektoratit për të garantuar kushte më të sigurta për punëtorët.
“Siguria në punë në çdo shtet, në çdo vend të punës duhet të ketë kujdesin e vetë, këto tragjedi ndodhin kudo edhe në shtetet më të zhvilluara, por në raport me neve janë një numër shumë i vogël. Shkaktari i kësaj janë veprimet e aktiviteteve punuese që janë marrë. Për momentin ndërtimtarinë e kemi si sektorin më të rrezikshëm, ne jemi gradualisht duke shkuar, jemi shtet i ri, formim i sipër, ky institucion i sigurisë në punë ka 10 vite që funksionon në Kosovë, jo më shumë, jemi tu shkuar shkallëve për ruajtjen e shëndetit të punëtorëve tonë, parandalimi është mbi të gjitha. Siguria në punë është gjëja kryesore që duhet t’i sigurohet një punëtorit, kemi një numër të vogël të inspektoratit, por me shpresë se do të rriten, fatkeqësisht nga vitet paraprake, viti i kaluar ka qenë një vit tmerrues për gjithë neve. 2025 kemi pasur 32 raste ndërsa 2024 kemi pasur 12 raste, për fat të keq deri më tani kemi shifrën prej 6 aksidenteve për këto tre muaj”, ka deklaruar Bajraktari në emisionin “Ditari” në Tëvë1./teve1.info/
