Deputeti i Aleanca për Ardhmërinë e Kosovës, Ramush Haradinaj, ka reaguar ndaj vendimit të ministres në detyrë të Mjedisit, Fitore Pacolli, për ndalimin e transportit të materialeve ndërtimore në Bjeshkët e Nemuna.
Përmes një postimi në Facebook, Haradinaj e ka cilësuar këtë vendim si një shkëputje të qeverisë nga realiteti me të cilin përballen qytetarët që jetojnë në këto zona.
“Vendimi i ministres në detyrë, Fitore Pacolli, për të ndaluar transportin e materialeve ndërtimore në Bjeshkët e Nemuna, me arsyetimin e mbrojtjes së ekosistemit, është një shembull i qartë i një qasjeje të paditur dhe të shkëputur nga realiteti. Pa e njohur terrenin, pa e kuptuar jetën e njerëzve që jetojnë atje dhe pa ndjerë vështirësitë e tyre, po merren vendime që godasin drejtpërdrejt familjet, fshatrat dhe ekonominë lokale”, ka shkruar ai.
Sipas Haradinajt, zona e Rugova dhe Bjeshkët e Nemuna nuk është vetëm një hapësirë natyrore në hartë, por një rajon i banuar me 13 fshatra, ku banorët jetojnë dhe përpiqen të zhvillojnë ekonominë lokale pavarësisht kushteve të vështira infrastrukturore.
Ai ka shtuar se në vend që kjo zonë turistike të mbështetet me investime në rrugë, infrastrukturë dhe zhvillim të qëndrueshëm, po përballet me vendime që sipas tij rrezikojnë ta izolojnë dhe të pengojnë zhvillimin e saj.
Ndërkohë, më 4 mars, ministrja e Mjedisit, Fitore Pacolli, njoftoi se do të ndalohet rreptësisht çdo aktivitet ndërtimor ilegal në parqet kombëtare në Kosovë.
“Ministrja Fitore Pacolli ka nxjerrë sot vendim që të ndalohet rreptësishtë çdo lloj aktiviteti ndërtimor ilegal brenda Parqeve Kombëtare “Bjeshkët e Nemuna” dhe “Sharri” në Kosovë. Me këtë vendim parashihet të ndalohet hyrja, transporti dhe qarkullimi i çdo mjeti që shërben për bartjen e materialeve ndërtimore, si dhe përdorimi i mjeteve të rënda të punës si eskavatorë, betonierë, buldozerë, kamionë vetëshkarkues dhe makineri të ngjajshme”, pati shkruar Ministria e Mjedisit.
Nga Ministria e Mjedisit është bërë e ditur se ky vendim konsiderohet si një hap drejt rikthimit të rendit dhe ligjshmërisë në zonat e mbrojtura.
“Ky është hapi ynë i parë në përpjekjen për të rikthyer ligjshmërinë dhe rendin në zonat e mbrojtura. Parqet tona kombëtare janë pasuri e përbashkët që duhet ruajtur secili nga ne”, thuhet në njoftimin e ministrisë.
