Luciano Spalletti do të jetë trajner i skuadrës së Juventusit edhe pas përfundimit të sezonit aktual kur edhe i skadon kontrata.
Mediumet në Itali, kanë raportuar të mërkurën se palët kanë arritur marrëveshjen për të vazhduar bashkëpunimin, e që do të zyrtarizohet së shpejti.
Me kontratën e re, Spalletti do të jetë në krye të Juventusit deri në qershor të vitit 2028 dhe do ta ketë opsionin e vazhdimit edhe për vitin e tretë kurse do të marrë pagë vjetore prej 5 milionë eurosh.
Spalletti më 30 tetor të vitit të shkuar, mori drejtimin e Juventusit duke zëvendësuar Igor Tudorin e shkarkuar dhe duke firmosur kontratë të përkohshme deri në qershor të këtij viti.
“Spalletti mbetet në zemër të projektit të Juventusit dhe palët tashmë kanë marrëveshjen për të vazhduar bashkëpunimin edhe për dy vite të tjera”, ka shkruar “Gazzetta dello Sport”.
Juventusi po lufton për të siguruar zonën që dërgon në Ligën e Kampionëve pasi aktualisht zë vndin e gjashtë në tabelë me 47 pikë të mbledhura.
