Kryetari i Unionit të Studentëve të UEJL, Mevlan Ademi, ka dalë me një mesazh publik pas deklaratave të Presidentit të Shqipërisë, Bajram Begaj, duke theksuar mbështetjen e Tiranës zyrtare për studentët shqiptarë në Maqedoninë e Veriut.
“Kur bijtë e shqipes hasin në vështirësi, Nëna Shqipëri përgjigjet,” ka shkruar Ademi, duke iu referuar mesazhit të Presidentit Begaj.
Ai shtoi se kreu i shtetit shqiptar dha një mesazh të qartë dhe të fortë se Shqipëria qëndron gjithmonë krah shqiptarëve, por njëkohësisht theksoi se e ardhmja varet nga angazhimi dhe përgjegjësia e të rinjve.
Ademi vuri në dukje rëndësinë e gjuhës dhe identitetit kombëtar: “Në momente kur zëri i studentëve nuk merret sa duhet në konsideratë dhe kur gjuha shqipe trajtohet si problem, Presidenti na kujtoi se gjuha dhe identiteti ynë nuk janë elementë formalë, por shtyllë themelore dhe aset i patjetërsueshëm i kombit. Gjuha jonë është histori, sakrificë dhe amanet brezash.”
Kryetari i Unionit të Studentëve falënderoi Presidentin Begaj për dhënien e zërit studentëve dhe për dëshminë se Tirana po i dëgjon kërkesat e tyre, duke e cilësuar këtë qëndrim si burim force, besimi dhe përgjegjësie për të vazhduar përpara me dinjitet.
Një falënderim të veçantë Ademi shprehu edhe për ambasadorin e Shqipërisë në Shkup, Denion Meidani, për rolin e tij në mbështetjen e komunitetit studentor dhe respektimin e Nenit 8 të Kushtetutës së Shqipërisë.
Në përfundim, Ademi theksoi se uniteti rreth gjuhës, identitetit dhe dinjitetit kombëtar është çelësi për t’u përballur me çdo sfidë.
