Të shtunën në mëngjes, ShBA-ja dhe Izraeli nisën një seri sulmesh ajrore ndaj Iranit.
Në përgjigje, Korpusi i Gardës Revolucionare Islamike (IRGC) e Iranit tha se qëlloi me raketa bazat ushtarake amerikane në Gjirin Persik.
Shpërthime u raportuan në Bahrein, Kuvajt, Emiratet e Bashkuara Arabe dhe Katar. Zyrtarët thanë se një person u vra nga shrapnela e një rakete iraniane në Emiratet e Bashkuara Arabe.
Shpërthime tronditën kryeqytetin iranian, Teheranin, ku njerëzit raportuan se panë tym që ngrihej nga lagjja që përfshin pallatin presidencial.
Numri i të vdekurve nga një sulm izraelit që goditi një shkollë fillore për vajza në Minab, një qytet në provincën Hormozgan të Iranit jugor tani është rritur në 40, sipas agjencisë shtetërore të lajmeve IRNA.
Irani gjithashtu lëshoi valë të shumta raketash drejt Izraelit, me shpërthime të raportuara në qiellin mbi Jerusalem. Forcat Mbrojtëse të Izraelit (IDF) thanë se sistemet e mbrojtjes ajrore po punonin për të rrëzuar “breshërinë e raketave” të lëshuara nga Irani.
Zyrtarët izraelitë u thanë mediave se udhëheqësit e lartë të regjimit iranian dhe udhëheqësit ushtarakë, përfshirë udhëheqësin suprem të Iranit, Ajatollah Ali Khamenei, dhe presidentin Masoud Pezeshkian, ishin në shënjestër të sulmeve, ka raportuar Guardian.
Besohet se Khamenei nuk është në Teheran dhe është dërguar në një vend të sigurt, ndërsa mediat iraniane raportojnë se Pezeshkian është i sigurt.
Presidenti i SHBA-së, Donald Trump, u zotua se fushata “masive dhe e vazhdueshme” kundër Iranit do të shkatërronte ushtrinë e tij, do të eliminonte programin e tij bërthamor dhe do të sillte një ndryshim në qeveri. “Objektivi ynë është të mbrojmë popullin amerikan duke eliminuar kërcënimet e menjëhershme nga regjimi iranian, një grup i egër njerëzish shumë të ashpër dhe të tmerrshëm”, tha ai.
Kryeministri izraelit, Benjamin Netanyahu, tha se operacioni kishte për qëllim eliminimin e një “kërcënimi ekzistencial”.
Bisedimet midis SHBA-së dhe Iranit mbi programin bërthamor të Teheranit përfunduan pa rezultat të qartë të premten, me një sugjerim se diskutime të mëtejshme do të mbaheshin javën e ardhshme.
