Në vazhdim të procesit gjyqësor në Dhomat e Specializuara të Kosovës në Hagë, avokati Aiden Ellis, që përfaqëson Jakup Krasniqi, ka deklaruar se kryerja e krimeve nga anëtarët e Policisë Ushtarake nuk është provë që klienti i tij të ketë pasur rol ose përgjegjësi për këto akte.
Ellis theksoi se ekzistojnë prova që disa anëtarë të Policisë Ushtarake kanë rrahur persona të ndaluar, dhe sipas mbrojtjes, çdo përdorim i forcës nga ata anëtarë përbën shkelje të rregulloreve të pretenduara nga Prokuroria.
Ai gjithashtu nënvizoi se gjatë këtij procesi janë marrë dëshmitë e shumë dëshmitarëve, përfshirë rreth 40 anëtarë të UÇK-së.
Megjithatë, sipas mbrojtjes, vetëm një prej tyre ka deklaruar të ketë parë rregullore të UÇK-së, ndërsa të tjerët nuk kanë dhënë një konfirmim të tillë.
“Ka prova që disa anëtarë të Policisë Ushtarake kanë rrahur persona të ndaluar. Por, sa herë një anëtar i Policisë Ushtarake ka ushtruar forcën kundër një personi në ndalim, sipas nesh ka shkelur rregulloren në fjalë. Kryerja e krimeve nga anëtarë të Policisë Ushtarake nuk është provë sipas nesh që zoti Krasniqi të ketë luajtur rol në këto rregullore dhe ky rol të ketë pasur kontribut të konsiderueshëm në kryerjen e krimeve”, tha Ellis.
Deklarata përmbyllëse e mbrojtjes së Krasniqit po vazhdon në seancën e së hënës, duke u fokusuar tek pretendimet e Prokurorisë lidhur me komunikatat dhe përgjegjësinë e ish-krerëve të UÇK-së.
Ky moment shënon një hap të rëndësishëm në përfundimin e fazës së mbrojtjes së Krasniqit në gjykimin që përfshin gjithashtu Hashim Thaçin, Kadri Veselin dhe Rexhep Selimin. /teve1.info/
