Gjykata Themelore në Ferizaj ka aprovuar kërkesën e Prokurorisë Themelore të Ferizajt për caktimin e masës së paraburgimit ndaj gjashtë të pandehurve, për shkak të dyshimit të bazuar për kryerjen e veprës penale të vjedhjes së rëndë në bashkëkryerje dhe në tentativë.
Të pandehurit janë shtetas të Republikës së Kosovës: L.M., B.H., S.F., dhe shtetas të Republikës së Serbisë: D.T., M.M.
Sipas njoftimit zyrtar të gjykatës, ngjarja ka ndodhur më 1 shkurt 2026, rreth orës 01:45, në Kaçanik, ku të pandehurit kanë tentuar të depërtojnë në një artari për të përvetësuar mallra në mënyrë të kundërligjshme.
B.H. ka komunikuar me M.M. për organizimin e vjedhjes, ndërsa disa prej të pandehurve kanë përdorur mjete për thyerjen e rrethojave dhe dritareve.
Tre të pandehur të tjerë kanë qëndruar në automjetin pikap VW Caddy, duke vëzhguar situatën.
Ata janë kapur në flagrancë dhe më pas janë larguar nga policia.
“Pas mbajtjes së seancës dëgjimore dhe analizimit të shkresave të lëndës, gjyqtarja e procedurës paraprake i Departamentit të Përgjithshëm – Divizioni Penal Zajrete Muhaxheri, ka vlerësuar se ekziston dyshimi i bazuar, se më datë 1 shkurt 2026, rreth orës 01:45, në Kaçanik në një artari, të pandehurit në bashkëkryerje dhe tentativë, me qëllim të përvetësimit të kundërligjshëm për vete apo personin tjetër, me përdorimin e forcës dhe duke thyer kanë tentuar të depërtojnë në artari, në atë mënyrë që i pandehuri B.H., kishte komunikuar vazhdimisht me telefon me të pandehurin M.M., për të kryer këtë vjedhje dhe të përgatitur me mjete shufre metalike (hebell), një palë dana, 5 çelsa të ndryshme, 3 kaçavida, një mjet i mprehtë skalper dhe doreza, ku të pandehurit M.M. dhe D.T., kanë thyer rrethojat e dritareve të hekurave duke tentuar që të futen brenda në artari, ndërsa tre të pandehurit B., R. dhe L., ishin duke qëndruar në automjetin pikap VW Caddy , pronë e L., të cilët ishin duke vëzhguar situatën, dhe shofer i kësaj veture ishte B.H., pastaj të njëjtit janë zënë në flagrancë duke tentuar të kryejnë vjedhjen dhe janë arratisur nga policia”, thuhet në njoftim.
Gjyqtarja e procedurës paraprake ka aprovuar kërkesën e prokurorisë për paraburgim për të gjithë të pandehurit, i cili do të zgjasë një muaj. Ankesa kundër këtij aktvendimi nuk e shtyn ekzekutimin e tij.
