Kryeministri në detyrë i Kosovës, Albin Kurti i shoqëruar nga ministri në detyrë i Shëndetësisë, Arben Vitia sot vizituan Odën e Mjekëve të Kosovës.
Pas takimit me përfaqësuesit e OIK, Kurti tha se lajmi i mirë është që ka rënie të theksuar të largimit të mjekëve dhe të kërkesave për shërim jashtë vendit.
Ai theksoi bashkëpunimin e Odës së Mjekëve të Kosovës me Ministrinë e Shëndetësisë, me ç’rast tha se në gjashtë muajt e fundit 50 mjekë të komunitetit serb janë licencuar nga OIK.
“Oda e Mjekëve deri më tani i ka afër 5,500 mjekë të licencuar. Me ç’rast duhet përmendur që rreth 150 janë të komuniteteve jo-shumicë, dhe lajmi fort interesant është që në gjashtë muajt e fundit janë rreth 50 mjekë të komunitetit serb që janë licencuar nga Oda e Mjekëve, pra që po inkorporohen në sistemin tonë të shëndetësisë, gjithnjë për hir të pacientëve pa dallim etnie. Lajm tejet i mirë është që ka rënie të theksuar edhe të largimit të mjekëve, por gjithashtu edhe të kërkesave për shërim jashtë vendit, dhe unë besoj që bashkëpunimi i ngushtë midis Odës së Mjekëve dhe Ministrisë së Shëndetësisë e ka sjell një rezultat të këtillë”, tha ai.
Kryeministri në detyrë, Albin Kurti foli edhe për sfidat serioze që sipas tij do të ballafaqohet sistemi shëndetësor në vitet e ardhshme me mungesë të mjekëve sidomos të atyre të mjekësisë familjare.
“Njëra prej sfidave të cilën duhet ta adresojmë e cila nuk mund të rregullohet përnjëherë, është fakti që nga këta afër 5,500 mjekë të licencuar rreth 1,600 do të dalin në pension në 10 vitet në vijim. Andaj na duhet zëvendësimi me mjekë të rinj, dhe posaçërisht në fushën e mjekësisë familjare, ku kemi mungesa, dhe në veçanti kjo mungesë është e theksuar te disa prej komunave të Kosovës”, theksoi Kurti.
Kryetari i Këshillit Drejtues në OIK, Faik Shatri duke shprehur gatishmërinë për bashkëpunim, deklaroi se është hera e parë që një kryeministër viziton Odën e Mjekëve.
“Është hera e parë që një kryeministër viziton Odën e Mjekëve. Biseduam për zhvillimet e Odës së Mjekëve ndër vite, për të arriturat dhe për sfidat që na presin në të ardhmen. Ne siguruam kryeministrin dhe ministrin që jemi partner të afërt në zhvillimin e sistemit shëndetësor në Kosovë, edhe për zhvillimin e shëndetit të kësaj popullate, edhe zhvillimin e cilësisë së shërbimeve”, deklaroi Shatri./B.Ibishi/
