Gjatë kësaj jave, Sektori i Hetimeve i Stacionit Policor të Suharekës ka arritur të identifikojë pesë persona të dyshuar për përfshirje në raste të vjedhjes në këtë qytet.
Ky rezultat është arritur përmes hetimeve të hollësishme dhe bashkëpunimit të ngushtë me stacionet policore të Obiliqit dhe Fushë-Kosovës.
Sipas njoftimit të Policisë së Kosovës, njëri prej të dyshuarve, E.B. nga Fushë-Kosova, ka pranuar plotësisht akuzat gjatë intervistimit në prani të avokatit mbrojtës.
Po ashtu, dy të dyshuar të tjerë, O.S. dhe A.D., u identifikuan për një rast tjetër të vjedhjes së rëndë dhe gjithashtu pranuan kryerjen e veprës penale gjatë intervistimit.
Për një rast tjetër të vjedhjes së rëndë janë identifikuar edhe dy persona të tjerë, për të cilët dyshohet se kanë kryer veprën penale.
“Policia e Kosovës po dëshmon se është e vendosur dhe e palëkundur në luftën kundër krimit. Hetuesit punojnë pa u lodhur për të identifikuar, lokalizuar dhe arrestuar kryesit e veprave penale, veçanërisht ata që kryejnë vjedhje dhe vjedhje të rëndë. Krimi nuk ka vend në shoqërinë tonë,” thuhet në njoftim.
