Kryesuesi i Komisionit Qendror të Zgjedhjeve (KQZ), Kreshnik Radoniqi, të enjten ka pritur në një takim zyrtar zëvendësshefin e Divizionit për Ballkanin Perëndimor në Ministrinë Federale të Punëve të Jashtme të Gjermanisë, Matthias Conrad, si dhe zëvendësambasadorin e Gjermanisë në Kosovë, Christian Böttcher.
Sipas njoftimit zyrtar, në hapje të takimit Radoniqi i ka informuar mysafirët për angazhimin intensiv të KQZ-së në përmbylljen e procesit të rinumërimit të vendvotimeve, si dhe për përgatitjet që po bëhen për shpalljen e rezultateve përfundimtare të zgjedhjeve të parakohshme për Kuvendin e Kosovës.
Nga ana e tij, Matthias Conrad ka vlerësuar punën e Komisionit Qendror të Zgjedhjeve, duke e përgëzuar atë për organizimin dhe menaxhimin profesional të procesit zgjedhor.
Në fund të takimit, Radoniqi dhe përfaqësuesit e shtetit gjerman janë dakorduar për bashkëpunime konkrete në të ardhmen./teve1.info/
