Kryeministri në detyrë i Kosovës, Albin Kurti, ka bërë të enjten homazhe pranë varreve të dëshmorëve Vesel Avdyli, Ilir Mërturi dhe Naim Gashi, në 27-vjetorin e rënies së tyre.
Pas homazheve, sipas Zyrës së Kryeministrit, ai ka marrë pjesë në ceremoninë e zbulimit të pllakës përkujtimore kushtuar dëshmorit Ilir Mërturi në Parkun e Qytetit të Klinës.
Në fjalën e tij, Kurti ka theksuar se pllaka është një kujtesë që Kosovën ta mbajmë të lirë, të zhvilluar e të përparuar, duke nderuar sakrificën e dëshmorëve.
“Medaljoni i kujtesës që porsa zbuluam sot për Ilir Merturin në këtë park, që po ashtu mban emrin e tij, është shenjë e respektit shtetëror për flijimin e tij dhe e angazhimit tonë për të vërtetën historike. Është kujtesë që na thërret çdo ditë, që ta mbajmë Kosovën ashtu siç e deshën ata: të lirë, të zhvilluar e të përparuar, të denjë për sakrificën e tyre. Kjo pllakë është amanet për brezat që do të vijnë, që ta kuptojnë se liria është fituar mbi dhimbje të mëdha njerëzore dhe humbje të pakompenzueshme njerëzish dhe se ruajtja e mbrojtja e saj kërkon përgjegjësi dhe përkushtim, si nga institucionet e shtetit ashtu edhe nga shoqëria mbarë”, u shpreh kryeministri në fjalën e tij.
Ai ka kujtuar gjithashtu ngjarjet e fundit të janarit 1999, kur forcat serbe vranë 30 shqiptarë në Rogovë të Hasit, Goden dhe Bishtazhin të Gjakovës, duke përfshirë 21 luftëtarë të Ushtrisë Çlirimtare të Kosovës dhe nëntë civilë.
“Lavdi dëshmorëve Mërturi, Gashi dhe Avdyli, dhe të gjithë dëshmorëve të të gjitha epokave të kombit shqiptar. Nderim të gjithë martirëve të lirisë”, përfundoi ai./teve1.info/
