Gjigantët e teknologjisë Meta, TikTok dhe YouTube po përballen këtë javë me një proces gjyqësor historik në Kaliforni, ku akuzohen se platformat e tyre kanë nxitur një krizë të shëndetit mendor te të rinjtë.
Ky proces konsiderohet si një pikë kthese në debatin botëror për kohën që fëmijët kalojnë para ekraneve, pasi është hera e parë që këto kompani detyrohen të mbrohen në një gjykatë për dëmet që pretendon se shkakton dizajni i aplikacioneve të tyre.
Në qendër të padisë është një 19-vjeçare, e cila thotë se u bë e varur nga rrjetet sociale që në moshë të vogël.
Ajo pretendon se mënyra se si janë ndërtuar këto platforma për të tërhequr vëmendjen, i ka shkaktuar depresion të rëndë dhe mendime për vetëvrasje.
Avokatët e saj theksojnë se këtë herë kompanitë do të jenë nën një monitorim shumë më të rreptë sesa kur dëshmojnë në Kongresin amerikan.
Gjatë gjyqit pritet të dëshmojë edhe vetë Mark Zuckerberg, ndërsa kompanitë e tjera po përpiqen të ndërtojnë mbrojtje të ndryshme.
Meta argumenton se problemet e vajzës nuk lidhen me produktet e saj, ndërsa YouTube kërkon të trajtohet ndryshe nga rrjetet sociale si Instagrami apo TikTok-u.
Nga ana tjetër, kompania Snap, që ishte gjithashtu pjesë e padisë, vendosi ta mbyllë çështjen duke arritur një marrëveshje private me vajzën pak ditë para nisjes së procesit.
Ndërkohë që beteja ligjore vazhdon, këto kompani kanë nisur një fushatë të gjerë për të bindur opinionin publik se aplikacionet e tyre janë të sigurta.
Ato po shpenzojnë miliona dollarë në seminare me prindër, bashkëpunime me organizata rinore dhe mjete të reja kontrolli për kohën e qëndrimit në internet.
Megjithatë, kritikët dhe shoqatat e prindërve mbeten skeptikë, duke i cilësuar këto lëvizje si një përpjekje për të fshehur rrezikun real të varësisë digjitale.
