Disa orë pas skadimit të një armëpushimi katër-ditor midis qeverisë siriane dhe luftëtarëve të udhëhequr nga kurdët të shtunën, ministria e mbrojtjes e Sirisë njoftoi se armëpushimi ishte zgjatur edhe për 15 ditë të tjera.
Ministria e mbrojtjes tha në një deklaratë se zgjatja ishte në mbështetje të një operacioni të forcave amerikane për të transferuar militantë të akuzuar të të ashtuquajturit Shtet Islamik, të cilët ishin mbajtur në burgje në verilindje të Sirisë, në qendrat e paraburgimit në Irak.
Forcat Demokratike Siriane të udhëhequra nga kurdët konfirmuan zgjatjen e armëpushimit, raporton AP.
“Forcat tona konfirmojnë angazhimin e tyre ndaj marrëveshjes dhe përkushtimin e tyre për ta respektuar atë, gjë që kontribuon në uljen e tensioneve, mbrojtjen e civilëve dhe krijimin e kushteve të nevojshme për stabilitet”, tha grupi në një deklaratë.
Gjatë tre javëve të fundit, ka pasur përleshje të ashpra midis forcave qeveritare dhe SDF-së, në të cilat SDF-ja humbi pjesë të mëdha të zonës që dikur kontrollonte.
