Pas ndalimit të Granit Paçarizit, Policia e Kosovës ka ndaluar edhe Ideal Paçarizin, të dy anëtarë të familjes së kandidatit të PDK-së, Fetah Paçarizi, si pjesë e hetimeve për manipulim të votave dhe falsifikim të dokumenteve zgjedhore në zgjedhjet e 28 dhjetorit, raporton “Betimi për Drejtësi”.
Burimet bëjnë me dije se Hasan Paçarizi, djali i vëllait të Fetah Paçarizit, është ende në kërkim nga autoritetet.
Hetimet kanë zbuluar se mbi 6 mijë vota janë shtuar në mënyrë të paligjshme për kandidatët e PDK-së nga disa komisionerë, ndërsa Prokuroria ka bërë të ditur se secili që përfshihet në manipulim të votave dhe falsifikim të dokumenteve do të përballet me ligjin pa kompromis.
Kryeprokurori i Prokurorisë Themelore në Prizren, Petrit Kryeziu, ka konfirmuar se gjatë aksionit të sotëm në Komunën e Prizrenit janë ndaluar 109 persona për veprat penale të falsifikimit të rezultateve të zgjedhjeve të 28 dhjetorit, presione dhe kanosje, si dhe për dhënie dhe marrje ryshfeti.
Ndërkohë, 121 persona janë ftuar për intervistim, kurse pesë ose gjashtë të tjerë janë liruar, ndërsa disa nuk i janë përgjigjur ftesës për shkak se ndodhen jashtë vendit.
Arrestohet nipi i kandidatit për deputet Fetah Paqarizi, dyshime për presion dhe ryshfet në Prizren
