Kryetari i Kuvendit të Kosovës, Dimal Basha, së bashku me zëvendëskryeministren, njëherësh ministre e Punëve të Jashtme, Donika Gërvalla Schwarz, anëtarë të tjerë të kabinetit qeveritar dhe bashkëpunëtorë, bëri homazhe duke vendosur lule të freskëta te varri i Presidentit historik Ibrahim Rugova, në 20-vjetorin e ndarjes së tij nga jeta.
Basha tha se presidenti Rugova ka merita të jashtëzakonshme në përpjekjet për liri, pavarësi e shtetformim.
“Ai e udhëhoqi popullin tonë në kohëra dhe rrethana të vështira, kur ushtrohej dhunë dhe terror ndaj qytetarëve tanë, kur ata përjashtoheshin nga puna dhe nga institucionet arsimore. Si njeri i letrave, ai ndërmori hapa të menjëhershëm për instalimin e një sistemi paralel arsimor, i cili përbënte një arritje të jashtëzakonshme për kohën. Ai e kuptoi se arsimi është arma dhe shpresa jonë e vetme për të realizuar një Kosovë të lirë dhe pavarur. Ky sistem u mirëmbajt për gati një dekadë falë edhe shumë kuadrove arsimore, të cilët rrezikuan dhe sakrifikuan, duke punuar shpesh pa paga ose me paga shumë të ulëta”, vlerësoi në shënimin e tij, kryetari Basha.
Një meritë tjetër e Presidentit Rugova, theksoi kryeparlamentarit Basha, është ndërkombëtarizimi i çështjes shqiptare, duke pasur parasysh se asokohe pak kush dinte se ku ishte Kosova dhe me çfarë problemesh ballafaqohej populli ynë.
Kryetari Basha tha se Presidenti Rugova arriti të depërtojë në qendrat kryesore botërore, duke shpërfaqur terrorin dhe dhunën e Serbisë ndaj një populli të paarmatosur dhe të pafajshëm.
“Presidenti Rugova ka po ashtu merita në procese të rëndësishme, si ai i Rambujesë, si dhe në themelimin e institucioneve të pasluftës. Prandaj, ai mbetet një prej figurave më të rëndësishme të historisë moderne politike të vendit tonë, i cili dha një kontribut të jashtëzakonshëm për lirinë dhe pavarësinë që ne e gëzojmë sot”, theksoi kryetari Basha.
