Procesi i rinumërimit të fletëvotimeve nga zgjedhjet e parakohshme për Kuvendin e Kosovës, të mbajtura më 28 dhjetor 2025, po ecën me ritëm të ndryshëm nëpër komuna.
Edhe pse rinumërimi ka përfunduar tashmë në rreth gjysmën e komunave të vendit, numri i vendvotimeve të rinumëruara deri më tani përfaqëson vetëm 29 për qind të totalit të vendvotimeve që Komisioni Qendror i Zgjedhjeve (KQZ) ka vendosur t’i nënshtrojë rinumërimit të plotë.
Zëdhënësi i KQZ-së, Valmir Elezi, ka bërë të ditur se procesi ka nisur të martën më 13 janar 2026 në orën 18:00 dhe deri të premten, më 16 janar 2026 në orën 16:00, janë rinumëruar mbi 260 vendvotime nga gjithsej 914 të planifikuara.
“Rinumërimi ka përfunduar plotësisht në 18 komuna, ndërsa puna po vazhdon edhe në dy komuna të tjera, përkatësisht në Prishtinë dhe Prizren”, deklaroi Elezi, duke shtuar se procesi po zhvillohet në Qendrën e Numërimit dhe Rezultateve.
Sipas tij, vendimi i KQZ-së parasheh që në 10 komuna të rinumërohen të gjitha vendvotimet, ndërsa në 28 komuna të tjera vetëm 10 për qind e tyre. Elezi theksoi se mundësia e zgjerimit të rinumërimit do të varet nga parregullsitë eventuale që mund të identifikohen gjatë këtij procesi.
