Sekretari amerikan i Shtetit, Marco Rubio ka thënë se planifikon të takohet me zyrtarët danez javën e ardhshme, pas deklaratave të administratës Trump se ka për qëllim të pushtojë Grenlandën, që është një ishull vetqeverisës, pjesë e territorit të Danimarkës.
Që nga operacioni amerikan në Venezuelë, ku u rrëmbye presidenti Nicolas Maduro, Trump ka rifilluar argumentet për marrjen e ishullit për arsye sigurie, përballë kërcënimeve në rritje nga Kina dhe Rusia në Arktik.
Ministri i Jashtëm danez Lars Lokke Rasmussen dhe homologia e tij e Grenlandës, Vivian Motzfeldt, kishin kërkuar një takim me Rubion, sipas një deklarate të postuar të martën në faqen e internetit të qeverisë së Grenlandës.
Kërkesat e mëparshme për një takim nuk ishin të suksesshme, thuhet në deklaratë.
Rubio i tha një grupi të zgjedhur ligjvënësish amerikanë se qëllimi i administratës republikane ishte që përfundimisht të blinte Grenlandën, në vend që të përdorte forcën ushtarake, transmeton Associated Press.
Udhëheqësit e Francës, Gjermanisë, Italisë, Polonisë, Spanjës dhe Mbretërisë së Bashkuar iu bashkuan kryeministres daneze Mette Frederiksen në lëshimin e një deklarate këtë javë duke riafirmuar se ishulli i pasur me minerale, i cili ruan qasjet e Arktikut dhe Atlantikut të Veriut drejt Amerikës së Veriut , “i përket popullit të tij”.
Frederiksen paralajmëroi se një marrje e kontrollit nga SHBA-të do të përbënte fundin e NATO-s.
