Ish-ministrja e Drejtësisë, Albulena Haxhiu, ka përgëzuar ndryshimet e miratuara në Këshillin Prokurorial të Kosovës (KPK), duke i cilësuar ato si një hap të rëndësishëm drejt rritjes së transparencës dhe pavarësisë së sistemit të drejtësisë.
Përmes një reagimi publik, Haxhiu ka theksuar se nga janari i vitit 2026, KPK do të fillojë punën me përbërjen e re ligjore prej shtatë anëtarësh, ku për dallim nga përbërja e kaluar, balanci mes anëtarëve prokurorë dhe jo-prokurorë është dukshëm më i afërt.
Sipas saj, kjo përbërje e re siguron që KPK të mos mbetet një rreth i mbyllur i grupeve të interesit brenda sistemit prokurorial, por të përfshijë edhe zëra të pavarur nga jashtë, të cilët marrin vendime pa ndikime.
“Si rezultat i ndryshimeve të miratuara, nga janari 2026 Këshilli Prokurorial i Kosovës fillon punën me përbërjen e re ligjore prej 7 anëtarë.
Për dallim nga përbërja e kaluar, balanci mes anëtarëve prokurorë dhe jo‑prokurorë është dukshëm më i afërt. Kjo siguron që KPK, si një institucion kyç për funksionimin e drejtësisë, të mos mbetet një rreth i mbyllur i grupeve të interesit brenda sistemit prokurorial, por të përfshijë edhe zëra të pavarur nga jashtë, që marrin vendime pa u ndikuar nga askush”, ka shkruar ajo në Facebook.
Haxhiu ka paralajmëruar se sapo të konstituohet Kuvendi, do të sigurohet edhe zgjedhja e anëtarit të mbetur jo-prokuror, përmes një procedure që garanton përzgjedhje profesionale dhe pa ndikime politike, në përputhje me Ligjin e ri.
Ajo ka theksuar se reformat në drejtësi do të vazhdojnë, me synimin për ndërtimin e një sistemi të drejtësisë plotësisht të pavarur, të paanshëm dhe të besueshëm, që u ofron qytetarëve drejtësi efikase.
“Sapo të konstituohet Kuvendi, do të sigurohemi që edhe anëtari i mbetur jo‑prokuror të zgjidhet pa vonesa, përmes një procedure që garanton përzgjedhjen e një kandidati të përgatitur dhe pa ndikime politike, e i cili propozohet nga Komisioni me përbërje profesionale, ashtu siç parasheh Ligji i ri. Si përfaqësues të besuar të qytetarëve, mbetemi të përkushtuar të çojmë deri në fund pjesën tjetër të reformës në drejtësi. Qëllimi ynë është i qartë dhe më i fortë se asnjëherë më parë, një sistem i drejtësisë plotësisht i pavarur, i paanshëm dhe i pandikuar as nga jashtë e as nga brenda, që u ofron qytetarëve drejtësi efikase dhe të besueshme”, ka përfunduar Haxhiu./teve1.info/
