Një incident ka ndodhur gjatë mesditës në shkollën “Agim Ramadani” në Zhegër të Gjilanit, ku një votues ka pasur një përleshje verbale me zyrtarët e qendrës së votimit.
Sipas zëdhënësit të policisë për rajonin e Gjilanit, Ismet Hashani, nuk ka pasur përleshje fizike, por vetëm një fjalosje mes tyre.
“Ka qenë një fjalosje mes një personi dhe zyrtarëve të qendrës. Nuk ka pasur përleshje. Prokurori dhe njësitet relevante janë në vendin e ngjarjes”, ka deklaruar Hashani për tëvë1.info.
Ndërkohë, menaxheri i qendrës, Rrahman Agushi, ka sqaruar se incidenti ka ndodhur pasi një mërgimtar ka tentuar të asistonte nënën e tij të moshuar, por nuk kishte dëshmitë e nevojshme për të bërë asistencën.
Sipas Agushit, kur ai nuk është lejuar, ka ngritur zërin, çka ka çuar në përplasjen verbale.
“Kemi pasur probleme me rrymën dy herë, dhe një mërgimtar erdhi dhe tentoi të asistonte nënën e tij të moshuar. Por, kryesuesi i vendvotimit nuk e lejoi dhe kërkoi informacione edhe nga menaxheri. Kur ai ngriti zërin, ne nuk e lejuam të asistonte, sepse rregullorja nuk e lejon këtë pa pasur dëshmi të duhura. Policia ka intervenuar menjëherë dhe ka menaxhuar situatën,” ka thënë Agushi.
Prokuroria dhe policia janë ende duke hetuar rastin./teve1.info/
